Покистонга $8,7 млнлик ўзбек маҳсулотлари етказиб берилади

Тошкент. 24 апрел. ЎзТАГ – Ўзбекистонлик тадбиркорлар Покистонга қиймати $8,7 млнлик дуккакли ва қуритилган қишлоқ хўжалиги маҳсулотлари, тўқимачилик, тери ва нефть-кимё маҳсулотларини етказиб берадилар, деб хабар беради Ўзбек телеграф агентлиги (ЎзТАГ).

Бу келишувларга Ўзбекистон расмий делегациясининг Покистон Ислом Республикасига ташрифи чоғида эришилди. Шунингдек, Покистоннинг етакчи компаниялари билан музокаралар якунлари бўйича, фармацевтика, кўнчилик маҳсулотлари ва туризм саноатини ривожлантириш каби соҳаларда $35,5 млн миқдоридаги инвестиция лойиҳаларини амалга ошириш тўғрисидаги битимлар имзоланди.

Ўзбекистон Республикаси Ташқи савдо вазирлиги маълумотларига кўра, Покистон қишлоқ хўжалиги ва озиқ-овқат хавфсизлигини федерал вазирлиги раҳбарияти билан музокаралар доирасида, вазир С. Босан шахсан ўзи Ўзбекистон қишлоқ хўжалик техникасининг юқори сифатига баҳо берганини таъкидлади.

“Ўзбекистонда ишлаб чиқарилган техника европалик муқобилларидан кам эмас, айни пайтда жозибали нархга эга. Бугунги кунда Покистоннинг ўзида фақат тракторлардан 20 минг донасига эҳтиёж борлигини инобатга оладиган бўлсак, биз Покистонга ўзбек машиналарини етказиб бериш ва йиғишни ташкил қилишдан манфаатдормиз”, - деди Покистон вазири.

Томонлар божхона тўловларини таҳлил қилиш ва қайта кўриб чиқиш учун биргаликда ишчи гуруҳ тузишга келишиб олдилар. Бундан ташқари, Покистон томони покистонлик ишончли ҳамкорларини аниқлаш орқали Панжоб вилоятида қишлоқ хўжалигини механизациялаштириш воситаларини ишлаб чиқаришни тезда ташкил этиш учун барча ишларни қилишга тайёрлигини билдирди.

Томонлар сертификатлаштириш ва стандартлаштириш соҳасида ҳам ҳамкорликни йўлга қўйиш, шу жумладан, икки мамлакатнинг сертификатларини ўзаро тан олишни таъминлаш бўйича келишувларга эришдилар.

Покистон тижорат ва тўқимачилик саноати вазири М. Дагхнинг сўзларига кўра, Ўзбекистонда амалга оширилаётган ислоҳотлар янги имкониятлар очмоқда. Томонлар тўғридан-тўғри ҳаво алоқасини ўрнатишга ҳам келишиб олдилар.

Ушбу вазирликда имзоланган бошқа келишувлар қаторида икки мамлакат ишбилармон доиралари учун ҳам банклараро келишувларни тузиш ва виза жараёнини соддалаштириш бўйича келишувларни санаб ўтиш мумкин.

Сурат манбаи: https://www.youtube.com/watch?v=D8XmK2Ot6eQ