Полиция янги йил кечаси Истамбулдаги тунги клубга хужум қилган шахсни қўлга олди

Тошкент. 17 январ. ЎзТАГ – Турк полицияси янги йил кечаси Истамбулнинг Ортакей туманидаги Reina тунги клубига хужум қилган шахсни қўлга олди, деб ёзади ТАСС.
Ihlas агентлиги маълумотига кўра, асли ўзбекистонлик бўлган Абдулқодир Машарипов Истамбулнинг ғарбий қисмидаги Эсенюрте туманида полиция махсус операцияси доирасида қўлга олинган. Олинган хабарларга кўра, у танишининг уйида яширинган бўлган. Агентлик Машариповнинг қўлга олинганидан кейин туширилган суратини ҳам тарқатди. Унинг юзида кўплаб қонталашларни кўриш мумкин.
Ҳозирда қўлга олинган шахс Хафсизлик бошқармасига жўнатилган. У тиббий кўрикдан ўтказилиб, сўроқ қилинади.
Эслатиб ўтамизки, 1 январ янги йилга ўтар кечаси автомат билан қуролланган киши Истамбулнинг Reina тунги клубига бостириб кириб одамларга қарата ўқ узган эди. Натижада 39 киши қурбон бўлган, 65 хорижлик жароҳатланган эди. Улар орасида Саудия Арабистони, Марокаш, Иордания, Ливан, Ливия ва Исроил фуқаролари бор. Теракт учун масъулиятни таъқиқланган “Ислом давлати” ташкилотининг экстремистлари ўз бўйниларига олдилар.
Кейинчалик, турк ОАВ полиция гумондорнинг шахсини аниқлаганини маълум қилишди. У Абу Муҳаммед Хоросон лақабли Машарипов бўлиб чиқди. Шунингдек, Истамбулдаги манзиллардан бирида $150 минг пул топилди, тахминларга кўра, у теракт ижрочисига мўлжалланган бўлган.