Пойтахтнинг “Пахтакор” жамоаси Тошкентда эроннинг “Нафт” клуби билан ўйнайди

Тошкент. 24 феврал. ЎзТАГ – Бугун тошкент вақти билан соат 16:30да Осиё чемпионлар лигаси гуруҳ босқичи биринчи тури доирасида “Пахтакор” жамоаси эроннинг “Нафт” клуби билан ўйнайди, дея хабар беради Ўзбек телеграф агентлиги (ЎзТАГ).

“Нафт” эрон футболининг етакчиларидан бири саналади ва ҳозирда мамлакат чемпионатида етакчилик қилмоқда. Ўтган мавсумда жамоа Эрон чемпионатининг бронза медалларини қўлга киритган”, – деб таъкидлашди “Пахтакор” ФК матбуот хизматида.

“Эртага биз учун жуда муҳим ўйин. Асосий мақсадимиз ҳар бир ўйинда ғалаба учун ўйнаш, чиройли футбол намойиш этиш ва мухлисларимизни хурсанд қилиш. Рақибимиз Эрон чемпионатида пешқадамлик қилмоқда. Бу кўп нарсадан далолат беради. Аммо “Нафт”ни яхшилаб ўргандик, уларнинг кучсиз жиҳатларини яхши биламиз. Бундан ташқари, ўз майдонимизда ва мухлисларимиз қаршисида ўйнаймиз. Бу бизга устунлик беради. Таркибда фақат бир ўйинчи - Камолиддин Тожиев йўқ. У Туркиядаги йиғинда жароҳат олди”, – деб таъкидлади жамоа бош тренери Самвел Бабаян.