Прагматик футболнинг вақти келди
Тошкент. 29 июн. ЎзТАГ – Тўлқин Ташимов. Россиядаги ЖЧ-2018нинг G ва H гуруҳларидаги учинчи тур ўйинларига келиб, прагматик футболнинг вақти келди. Колумбия ўз дарвозаси ҳимояси ҳақида кўп ўйлаганига қарамасдан, Сенегал дарвозасига зарур голни уриш учун вақт топа олди, Польша эса турнирдаги илк ғалабасига эришди, Бельгия ва Англия энг сифатли ўйин кўрсатдилар.
Япония – Польша ўйини статистикасига қараганда ҳар икки жамоа ҳам унча фаоллик билан ажралиб турмаган. Одатда бундай ўйин ҳақида “ўз дарвозасига қараб ўйнади”, дейилади. Агар поляклар гуруҳ турнирининг бошидан бошлаб ҳозиргидай ўйнаганида, айни пайтда уларнинг плей-оффга чиқиш имкониятларини бошқача баҳолаган бўлар эдик. Ян Беднарекнинг Япония дарвозасига 59-дақиқада киритган ягона голи фақат ўйин тақдирини ҳал қилди, лекин Акиро Нисино шогирдларининг қисматини эмас.
Параллель бўлиб ўтган Колумбия – Сенегал ўйинида 1/8 финалнинг яна бир жамоаси аниқланиши зарур эди. Бутун биринчи таймда колумбияликлар тўпни кўпроқ назорат қилишга ҳаракат қилишди, Сенегал эса вақти-вақти билан хавфли қарши хужумлар уюштириб турди. Ўйин статистикасига кўра, сенегалликлар 7 зарба беришган, колумбияликлар эса 4 зарба йўллаган, бу эса чемпионатда прагматик футболнинг вақти келганини кўрсатади. Агар ўйиннинг 74-дқиқасида колумбиялик Ерри Мина учрашувдаги ягона голни киритмаганида, дуранг ҳисоби сақланиб қолар эди.
Ушбу икки ўйин кишининг ҳафсаласини пир қилди. Ўйлайманки, нафақат менинг.
Соат 23.00да майдонга чиққан Бельгия ва Англия қизиқарлироқ ва сифатлироқ ўйин кўрсатишди. Бельгиялик Аднан Янузайнинг 51-дақиқада киритган голининг ўзиёқ у ҳақига гапиришга арзийди.
Лекин...
Асосийси, ҳар икки жамоа кўрсатган ўйиннинг юқори сифати. Ҳар доимги каби, Бельгия, тўп билан техник ўйнади, тўп узатишларни қизиқарлироқ амалга оширди, ўйинчиларнинг майдонда ҳаракатланиш тезлиги ҳам анча юқори бўлди. Англия эса, олдинлари бўлгани каби, кўпроқ узун ва ўрта тўп узатишлардан фойдаланди, қанотлардан хужум қилди, ва тўп билан анча яхши ўйин намойиш этди.
Минималь ҳисобдаги ғалаба Бельгияни гуруҳдаги биринчи ўринга олиб чиқди ва плей-оффда Япониянинг рақибига айлантирди, Англия эса Колумбия билан ўйнайди.
Эслатиб ўтамизки, ЖЧ-2018 – ФИФАнинг футбол бўйича 21-жаҳон чемпионати бўлиб, унинг финал қисми Россияда 2018 йил 14 июндан 15 июлгача бўлиб ўтади. Россия ўз тарихида биринчи бор турнирга мезбонлик қилмоқда. Чемпионат Россиянинг 11 шаҳридаги 12 стадионларда ўтказилмоқда. Бундан ташқари, чемпионатда илк марта ҳакамларга видеоёрдам тизимидан фойдаланилмоқда.
Сурат манбаи: https://m.football-lineups.com/
