Produkce Trestikova чех кинокомпанияси Ўзбекистон ҳақида кўрсатув ола бошлади
Тошкент. 25 август. ЎзТАГ – Чехиянинг Produkce Trestikova кинокомпанияси Ўзбекистон ҳақида кўрсатув олиш ишларини бошлади, деб хабар беради Ўзбек телеграф агентлиги (ЎзТАГ).
“Кўрсатувда ўзбек халқининг бой тарихий маданияти, археологик обидалари, анъаналари, шунингдек, Чехия ва Ўзбекистоннинг ҳамкорлиги ҳақида ҳикоя қилинади”, - деб таъкидлашди Электрон оммавий ахборот воситалари миллий уюшмасида.
Ўзбекистондаги суратга олиш ишлари “Археологиянинг саргузаштлари: хориждаги чех археологлари ҳақида” номли хужжатли сериал яратиш ишининг бир қисмидир. У чех археолог олимларининг фаолияти ва уларнинг тадқиқот экспедицияларига бағишланган. Суратга олиш ишлари Миср, Судан, Болгария, Ўзбекистон ва Чехияда бўлиб ўтади.
Сериалнинг Ўзбекистон ҳақидаги бўлими 1 соат давом этади. Суратга олиш ишлари Самарқанд ва Тошкентдаги археологик қазилмалар жойларида ўтказилиши режалаштирилган. Шунингдек, ижодий гуруҳ камераси объективига Сурхандарёдаги археология музейи ҳам тушади.
