Профессионал боксчилар, жумладан, Ўзбекистонликлар ҳам Риодаги Олимпиа ўйинларида иштирок этадилар

Ташкент. 3 март. ЎзТАГ – Халқаро ҳаваскор боксчилар ассоциацияси (AIBA) “Рио-2016” Олимпиада ўйинларида профессионал бокчилар, жумладан, Ўзбекистонликларнинг ҳам иштирок этиши учун жорий йилнинг июн ойида ташкилот низомига ўзгартириш киритади, деб хабар беради Ўзбек телеграф агентлиги (ЎзТАГ).

Мамлакат МОҚнинг AIBA раҳбари Чинг-Куо Вуга асосланиб маълум қилишича, ташкилотнинг февраль ойида Манчестер шаҳрида (Буюк Британия) бўлиб ўтган йиғилишида профессионал боксчиларнинг ҳам Олимпиада ўйинларида иштирок этишларига рухсат берилиши тўғрисидаги қарор қабул қилинган эди. 

“Профессионал боксчилар “Рио-2016” ўйинларида қатнашадилар. Уларнинг сони қанча бўлишини билмадим-ку, бироқ иштирок этадилар. Бироқ, улар ҳам бошқалар каби саралаш босқичидан ўтишлари лозим. Биз июнь ойида ўтказиладиган навбатдан ташқари Конгрессда AIBA Низомига ўзгартириш киритамиз. Ташкилотимизнинг мақсади профессионалларга ҳам эшикни очиш. Янглишмасам, бокс Олимпиада ўйинларида профессионаллар иштирок этмайдиган ягона спорт тури бўлса керак”, - деб иқтибос келтиради Ўзбекистон МОҚ Чинг-Куо Вунинг сўзларидан.

AIBA раҳбарининг таъкидлашича, қоидаларга ўзгартиришлар киритилгач, профессионал боксчилар “Рио-2016” Олимпиада ўйинларига йўлланмаларни июнь ойида Озарбайжонда ўтказиладиган саралаш турнирида қўлга киритадилар.