Прогнозларга қарши ўлароқ “Ювентус” “Реал”ни енгди, Тевес эса ажойиб ўйин кўрсатди

Тошкент. 6 май. ЎзТАГ – Кутилганига қарши ўлароқ (“Реал” ғалабаси 61% билан, “Ювентус” устунлиги 39% билан тахмин қилинган эди) италян клуби мадридликларни 2:1 ҳисобида енгди, дея хабар беради Ўзбек телеграф агентлиги (ЎзТАГ) УЕФА Чемпионлар лигаси биринчи ярим финал ўйини тугаганидан бир неча соат кейин.

Кеча ёзганимиз каби, “Ювентус” бош тренери Массимилиано Аллегри ўйин режасини тўлиқ амалга ошириб, Карлос Тевес ёрдамида ҳамкасби Карло Анчелоттини “алдай” олди. Айнан Тавеснинг испанлар жарима ҳудудида ажойиб ҳолда очилиши италияликларга биринчи голни уришга имкон берди. Кейинроқ эса айнан унинг ўзи “Реал” жарима ҳудудида хужумчини йиқитганлик учун қўйилган жарима тўпи – пенальтини киритди.

Пенальтига келсак, ҳимоячи оёғини олдинга чўзиб ахмоқлик қилди, Тевес эса бундан фойдаланди.

Бизнинг Гарет Бэйл ва Андреа Пирлога ишончимиз ўзини оқламади: ушбу ўйинчилар майдонда деярли “кўринмади”.

Ҳозирнинг ўзидаёқ Мадриддаги бўлажак ўйинни тасаввур қилиш мумкин. Аллегри уч марказий ҳимоячиларни майдонга чиқаради, ҳимояни кучайтиради ва қарши хужумлар уюштиради. Анчелотти эса хужумкор таркиб билан ўйинга тушишга мажбур бўлади. Бунда Бэйл ўрнига Чичаритони ўйинга тушириш зарур. Чунки Бэйл яхши ҳимоя ва очиқ ҳудудлар бўлмаган ҳолда деярли фойдасиз ўйинчига айланади. Карим Бензема ҳам майдонга туширилса яхши бўлар эди, айниқса, у чапда ҳаракат қилса ҳавфли ўйинчига айланади.

Хуллас, бир ҳафтадан кейин “Сантьяго Бернабеу”да бизни ажойиб ва қизиқарли ўйин кутади.