Рўйхатга олиш масаласи шошилинч тиббий ёрдам кўрсатишга тўсқинлик қила олмайди – Соғлиқни сақлаш вазирлиги

Тошкент. 30 май. ЎзТАГ – Рўйхатга олиш масаласи шошилинч тиббий ёрдам кўрсатишга тўсқинлик қила олмайди, дея хабар беради Ўзбек телеграф агентлиги (ЎзТАГ).

"Тез тиббий ёрдам хизматининг асосий вазифаси фуқаролар ҳаётига таҳдид соладиган ҳолатларда биринчи тиббий ёрдам кўрсатишдир. Ушбу тиббий ёрдам ҳар қандай ҳолатда – бемор Ўзбекистон фуқароси ёки чет эллик меҳмон бўладими, қатъи назар, у бепул тақдим этилади. Ўзбекистон Республикаси Конституциясининг 40-моддасида "Ҳар бир инсон малакали тиббий ёрдам олиш ҳуқуқига эга", - дейилади Соғлиқни сақлаш вазирлиги матбуот хизмати хабарида.

Тошкент шаҳар тез тиббий ёрдам станциясининг бўлим бошлиғи Насиба Маҳмудованинг сўзларига кўра, тез тиббий ёрдам чақирувларида бригада чақирув манзилига келганидан кейин тиббий ходим беморнинг яшаш жойини сўрайди.

"Бу рақам чақирув қоғозидаги "яшаш манзили" графасини тўлдириш учун амалга оширилади. Эртаси куни тез тиббий ёрдам хизматига мурожаат қилган бемор ҳақида бирламчи тиббий ёрдам муассасаларига, яъни унинг яшаш жойидаги поликлиникага маълумот берилади. Бу эса кейинги ўзаро интеграцияни таъминлайди, яъни тез тиббий ёрдам хизматига мурожаат қилган бемор умумий амалиёт шифокори ва поликлиниканинг патронаж ҳамшираси назорати остида бўлади. Тез тиббий ёрдам хизмати беморга фақат симптоматик ёрдам кўрсатади, яъни касаллик белгилари олдини олишга қаратилган процедуралар ўтказади, поликлиникалар эса такрорий касалликнинг олдини олишга қаратилган даволаш чораларини кўради", - дея таъкидлайди у.

Бундан ташқари, беморнинг яшаш манзили тегишли тартибга кўра, қайси муассасага касалхонага жойлаштирилиши мумкинлиги асосида аниқланади. Барча шифохоналарда ўрин чекланганлиги сабабли, беморларнинг шифохоналарда тенг тақсимланишини таъминлаш ва уларнинг самарали даволанишига эришиш мақсадга мувофиқдир.

Соғлиқни сақлаш вазирлигининг юридик бўлими бошлиғи Руслан Мухаммадиев Тошкент шаҳри меҳмонлари ва маълум бир жойда вақтинчалик прописка эга бўлганлар Тошкент шаҳрида доимий пропискага эга бўлган фуқаролар билан бир хил даражада тиббий ёрдам кўрсатаётганини қайд этади. У тез тиббий ёрдам кўрсатишда ҳеч қандай яшаш ҳуқуқи ёки шахснинг фуқаролиги муҳим эмаслигини қўшимча қилди.

"Ўзбекистон Республикасининг "Фуқаролар соғлиғини муҳофаза қилиш тўғрисида"ги Қонунининг 29-моддасига мувофиқ энг кенг тарқалган касалликлар, жароҳатлар, заҳарланиш ва бошқа кечиктириб бўлмайдиган ҳолатларни даволаш давлат соғлиқни сақлаш тизими томонидан бепул ва ҳеч қандай тўсиқсиз амалга оширилади. Ўзбекистон Республикаси маъмурий жавобгарлик тўғрисидаги кодексининг 59-моддасига мувофиқ, ҳаёт ёки соғлиқ учун хавфли бўлган шахсга фавқулодда ва (ёки) шошилинч тиббий ёрдам кўрсатишни асоссиз равишда рад этиш тегишли маъмурий жавобгарликка сабаб бўлади. Беморга жойида ёрдам берилгандан сўнг, агар уни касалхонага олиб бориш зарур бўлса, Соғлиқни сақлаш вазирлигининг тегишли ҳужжатига кўра, тез тиббий ёрдам ходими уни Тошкент шаҳрида жойлашган шифохонага олиб бориши керак", - дея қайд этди у.

Тез тиббий ёрдам кўрсатишда яшаш учун рухсатнома масаласида далил сифатида фойдаланиш қонунни бузиш ҳисобланади.

 

Сурат манбаи: minzdrav.uz