Рашид Қурбонов FILAверсияси бўйича ўтган йилнинг энг зўр курашчиси деб топилди

Тошкент. 5 апрель. ЎзТАГ – Ўзбекистон терма жамоаси етакчиси Рашид Қурбонов (74 кггача вазн тоифаси) FILA (Курашнинг бирлашган усуллари халқаро федерацияси) версияси бўйича 2013 йилнинг энг зўр курашчиси деб топилди, дея хабар беради Ўзбек телеграф агентлиги (ЎзТАГ).
Ўзбекистон Спорт курашлари ассоциациясидан хабар беришларича, ўтган йили Қурбонов Деҳлида Осиё чемпионатини, Бокуда Голден Гран-при финалини ютиб олди, Будапештда бўлиб ўтган жаҳон чемпионатида учинчи ўринни эгаллади ва эркин курашчилар орасида энг кўп – 21 очко тўплади.
Энг яхшиларни аниқлашда жаҳон чемпионати ва қитъа биринчиликларида қатнашиш натижалари, Голден Гран-при финал серияси натижалари ҳамда олимпиада йили эса тўртйилликнинг асосий мусобақалари натижалари ҳам ҳисобга олинади.
Эслатиб ўтамиз, ўтган йили FILA дунёнинг энг кучли уч курашчилари сафига Ўзбекистон терма жамоаси аъзолари Рашид Қурбонов (эркин кураш, 74 кггача) ва Элмурод Тасмурадовларни (грек-рим кураши, 60 кггача) киритди.