Ravon 2ни синовдан ўтказган россия журнали мухбири автомобилни мақтади

Москва. 5 апрел. ЎзТАГ – GM-Uzbekistan заводига (Асака, Ўзбекистан) ташрифдан сўнг Ravon 2ни синовдан ўтказган “За рулем” россия журнали мухбири Вадим Крючков ушбу автомобилни мақтади, деб хабар беради Ўзбек телеграф агентлиги (ЎзТАГ).

Унинг сўзларига кўра, Ravon 2ни йиғиш ишлари конвейерлардан бирида Gentra ва Matiz моделлари билан бирга жадал кетмоқда.

“Ravon R2 яхши таниш бўлган Spark моделининг учинчи авлоди бўлиб, олдингидан кўра арзонроқ ва диққатга арзирлироқдир. У Chevroletдан энг аввало куч агрегати билан фарқ қилади. Бу ерда 4-босқичли Aisin автоматик узатиш қутиси билан биргаликда бир литр сиғимдаги кучсиз мотор эмас, балки Ўзбекистонда ишлаб чиқарилган бензинда ишловчи 1249 “кубик”ли 85,5 от кучи қувватига эга S-TEC II мотори ишлайди. Ушбу агрегатлар Евро-5 экологик меъёрларига жавоб беради ва қийин эксплуатация шароитларига эга мамлакатларда ўзини яхши кўрсатган”, - деб таъкидлайди “За рулем” мухбири.

Нашр маълумотларига кўра, Ravon 2нинг россия салонларидаги бозор нархи асос комплектация учун 369 000 рублдан бошланади. Рақобатчи моделларнинг нархлари эса 644 000 рублдан бошланади. Автомобилларнинг биринчи партияси аллақачон сотиб бўлинган.