Равшан Эрматов Globe Soccer Awards мукофотининг лауреати бўлди

Тошкент. 28 декабр. ЎзТАГ – Ўзбекистонлик ФИФА ҳаками Равшан Эрматов халқаро Globe Soccer Awards футбол мукофотининг лауреати бўлди, деб хабар беради Ўзбек телеграф агентлиги (ЎзТАГ) мукофотнинг Twitterдаги расмий саҳифасига асосланган ҳолда.

Хабар қилинишича, ғолибларни тақдирлаш маросими ўтган якшанба куни, 27 декабрда Дубайда бўлиб ўтган. Мукофотга номзодлар Европа клублари уюшмаси томонидан (ECA) маъқулланган.

Р.Эрматов Globe Soccer Awards мукофотини 2015 йилнинг энг яхши ҳаками сифатида олди. Бундан ташқари, Криштиану Роналду ва Жанлуижи Буффондан ўзиб кетган Лионель Месси йилнинг энг яхши футболчиси деб топилди. Лео ўйнайдиган “Барселона” эса “Днепр”, “Бавария”, “ПСЖ” ва “Ювентус”ни ортда қолдириб энг яхши жамоа деб тан олинди. “Барселона” раҳбари Хосеп Мария Бартомеу энг яхши жамо бошлиғи деб, Бельгия термаси мураббийси Марк Вильмотс энг яхши тренер деб, “Бенфика” энг яхши академия деб топилди. Энг яхши футбол агенти деб португалиялик Жорже Мендеш тан олинди.

Конкурс ҳакамлари таркибига клублар президентлари, ўйинчилар, тренер, агент ва ҳакамлар кириши айтилмоқда.

Эслатиб ўтамизки, 2014 йилда Равшан Эрматов 9 ўйинни бошқарган ҳолда Жаҳон чемпионатларида ўтказилган ўйинлар сони бўйича рекорд ўрнатган эди.