“Реал” – “Манчестер Сити”: мўъжиза юз бериши мумкинми?

Тошкент. 4 май. ЎзТАГ – “Манчестер Сити” бугунги ўйинда “Реал”ни енгиб, финалга йўлланма олиши ва Миланнинг “Сан Сиро” стадионига бориши мумкинми? Бу савол кўпчиликни қизиқтирмоқда. Чунки ишқибозлар бугун Тошкент вақти билан 23.45да ҳақиқий футбол томошасини кўришни истайдилар, деб хабар беради Ўзбек телеграф агентлиги (ЎзТАГ) УЕФА чемпионлар лигаси яримфинали иккинчи жавоб ўйини олдидан.

 Бугун “Манчестер Сити”нинг бош тренери Мануэль Пеллегрини ўз вазифасидан кетиши ва унинг ўрнига ёзда Хосеп Гвардиола келиши барчага маълум. Шу сабабли ҳам чилилик мутахассис ўзидан яхши ном қолдириш учун барча нарсага, шу жумладан, мўъжиза яратишга ҳам тайёр.

Лекин истакнинг ўзи ҳеч нарсани билдирмайди. Бунинг учун биринчи яримфинал ўйинини эслаш кифоя. Ўшанда “Бавария” етакчиси ҳам худди шунга ўхшаш ҳолатда эди. Гвардиола қилолмаган ишни Пеллегрини қила олармикан?

“Реал”нинг бош тренери Зайниддин Зиданга келсак, шуни айтиш мумкинки, у жамоани яқинда қабул қилиб олди ва сезиларли муваффақиятларга эришди. Айниқса, ўзининг олдинги ҳамкасби Рафаэль Бенитеснинг хужумкорликка урғу берилган ўйин тактикасидан вос кечди.

Энг асосийси, қироллик клубининг бошланғич таркибида Криштиану Роналду ҳам майдонга тушади. “Реал”нинг суперюлдузсиз ўйнай олиши ва “Манчестер Сити”ни енги олиши ҳақида қанча гапирмайлик, Роналду билан бирга испан клуби ўйини қизиқарлироқ тус олишини тан олиш керак.

Биринчи ўйинлар олдин тахмин қилганимиз каби, устунлик “Реал” томонда! Агар “Манчестер Сити” мўъжизавий ўйин кўрсатиб, рақибини енгса, бундан фақат ишқибозлар ютади. Кўрамиз, нима бўларкин…