“Реал” ёки “Ювентус”, Роналду ёки Тевес?
Тошкент. 13 май. ЎзТАГ – Тўлқин Ташимов. Бугун кечаси “Реал” ёки “Ювентус” жамоаларидан қайси бири ўзини қайта тиклаган “Барселона”нинг рақибига айланиши маълум бўлади, деб хабар қилади Ўзбек телеграф агентлиги (ЎзТАГ) УЕФА Чемпионлар лигаси яримфинал жавоб ўйини олдидан.
Мақола сарлавҳасида Роналду ёки Тевес, деган савол қўйдим. Аммо бу дегани “Сантьяго Бернабеу”даги тошкент вақти билан соат 23.45да бошланувчи ўйин ушбу икки футболчиларнинг қарама-қаршилигига бориб тақалади, дегани эмас.
Биринчи ўйин кўрсатгани каби, клуб таркибида юлдузлар бўлиши муҳим ва зарур, аммо бундан ташқари майдонга жамоа ҳам тушиши зарур. Айнан катта ҳарфлар билан ёзиладиган Жамоа!
Тўғри, мадридликларнинг бошланғич таркибида Родригес-Иско-Бэйл-Роналду-Бенземадан ташкил топган кучли хужум линияси бўлади. Агар Роналдуни қарашидан тушунадиган Карим Бензема яхши ҳолатда бўлса, “Ювентус” ҳимоячиларига қийин бўлади. Жуда қийин.
Ўз навбатида, турин клуби бош тренери Массимилиано Аллегри бошланғич таркибда Карлос Тевес ва Альваро Мораталарни туширади. Олдинда икки хужумчиларсиз “Ювентус” “Реал”га қарши тура олмайди. Роналду ва шериклари ўз майдонларида, одатда, яхши гол урадилар. Агар икки “П” – Погба ва Пирло ўзини яхши сезиб, ўйинга киришиб кетса, улар “қироллик клуби” ҳимоячилари “қонини” яхшигина “ича” оладилар.
Лекин алалхусус ўйинда Жамоа ва Мураббий ютади. Айнан шундай, бош ҳарфлар билан ёзиладиган жамоа ва мураббий. Карло Анчелотти ёки Массимилиано Аллегри? Бунда икки итальян мураббий ўртасидаги классик қарама-қаршилик бўлиши кутилмоқда.
“Реал” ёки “Ювентус”нинг УЕФА Чемпионлар лигаси финалидаги “Барселона”га қарши имкониятлари масаласига келсак, айтиш мумкинки, улар нолга тенг.
Хусусан, бу ҳақида биринчи яримфинал ўйинидан келиб чиқиб ўйланса...
Лекин ҳакам Юнас Эрикссон УЕФА Чемпионлар лигаси иккинчи яримфинал ўйинини бошланиш ҳуштагини чалганидан кейин ҳам финал фаворити, ҳам барча башоратлар ўзгариб кетиши мумкин.
