Роналду ва Нани Португалияни Евро-2016 финалига олиб чиқди

Тошкент. 7 июл. ЎзТАГ – Тўлқин Ташимов. Криштиану Роналду ва Нани иккинчи тайм бошида Уэльс дарвозасига икки жавобсиз тўп урган Португалия термасини Евро-2016 финалига олиб чиқди.

Ўтган тунда эса содир бўлиши керак бўлган воқеа содир бўлди.

Биринчи яримфинал ўйинига қадар кишида ҳаяжон уйғотмайдиган ўйин кўрсатиб, асосий вақтда бир марта ҳам ғалаба қилмаган Португалия оддийгина қилиб айтганда яхши ўйнади. Бироқ биринчи тайм турнирдаги энг зерикарли таймлардан бўлди: жамоалар эҳтиёткорона ўйин кўрсатиб, рақиб дарвозасига кириб бориш йўлларини қидирдилар.

Ҳаттоки, вақти вақти билан кишида телевизорни бошқа каналга ўтказиб юбориш фикри келди.

Лекин иккинчи таймнинг боши ўта қизиқарли бўлди. Олдин Роналду бурчак тўпидан сўнг тўпни боши билан дарвозага йўллади (1:0). Уч дақиқалар кейин эса Криштианунинг ноаниқ зарбасидан кейин Нани Уэльс термаси дарвозаси олдида вақтида пайдо бўлди (2:0).

Гарет Бэйл қаерда эди дейсизми?

Тўғрисини айтадиган бўлсак, у биринчи таймда Роналдудан анча яхши ўйнади ва бир марта дарвозага тўп йўллаш учун майдоннинг учдан икки қисмини ёриб ўтди. Лекин бу вазиятда зарба унча ҳам яхши чиқмади.

Валлийликлар таркибида Аарон Рэмзининг йўқлиги термага салбий таъсир қилди. Чунки айнан у зарур ҳолларда тўпни ўзида тутиб турар, кескинлик келтириб чиқарувчи тўплар етказиб берар ва голли вазиятлар яратар эди.

Афсуски, бу ишни бошқа бирон киши қила олмади.

Валлийликларнинг биринчи ва иккинчи голдан кейин хужумдаги унчалик фаол бўлмаган ўйинини фақат шу билан тушунтириш мумкин бўлса керак.

Роналду ўзининг Евродаги 9-голини киритди ва афсонавий француз Мишель Платинига етиб олди. Португалия термаси эса ўз тарихида иккинчи марта Еврокубок финалига чиқди ва унда Германия ёки Франция термаларидан бирига қарши келади...

Бу термаларнинг қандайлигини тушунтириб ўтириш зарур бўлмаса керак.

Айнан бугун, 7 июлда португаллар финалда қандай ҳолатда бўлишларини олдиндан айтиш қийин. Нима бўлганида ҳам таркибда Криштиану Роналдунинг борлиги Европа чемпиони деган номни қўлга киритиш имконини билдиради. Бунга жиддий асослар бор.

 Ҳозирча эса, бугун тошкент вақти билан соат 00.00да Германия ва Франция термаларининг қарама қаршилигини кутамиз. Маълумки ўйин Марселда бўлиб ўтади

Эслатиб ўтамизки, Евро-2016нинг учинчи ўрни учун ўйин умуман ўтказилмайди.

Чемпионатнинг финал ўйини 11 июлда “Стад де Франс” стадионида бўлиб ўтади.