Россия бозорида «Уз-ДЭУ» автомобиллари қимматлашди

Тошкент. 7 март. ЎзТАГ – «Уз-ДЭУ» компаниясининг Россиядаги ваколатхонаси ушбу мамлакат бозорида сотилаётган барча моделлар нархларини янгилади, дея хабар бермоқда Ўзбек телеграф агентлиги (ЎзТАГ).
wroom.ru автомобиль сайти маълумотига кўра, автомобиллар орасида энг қўп қимматлаган – ўтган йили бозорга чиқарилган Daewoo Gentra седани бўлди Унинг нархи 15-20 минг рублга ошди. Эндиликда ушбу моделнинг Comfort комплектацияси олдинги 399 минг рубль ўрнига 414 минг рубль туради. Optimum ва Optimum Plus комплектацияларининг баҳоси ҳам ошди. Аммо энг қиммат версия – Elegantнинг нархи ўзгаргани йўқ ва 490 минг рублдан бошланади.
Daewoo Nexia ва Daewoo Matiz автомобилларининг нархи атига 7 минг рублга оширилди. Эндиликда Nexia седани нархлари 289 минг рублдан бошланади (илгари 282 минг рубль эди). Ихчам қилиб ишланган Matiz эса ҳаридорга камида 254 минг рублга тушади (илгари - 247 минг рубль).
Эслатиб ўтамиз, Gentra седани эски Lacetti моделининг янгиланган кўриниши бўлиб, у Россияда 2013 йил сентябрдан бошлаб таклиф этилмоқда. Ноябрь ойида ушбу моделдан 2000 ошиқ сотилди ва Gentra сотув ҳажми бўйича Matiz ва Nexiaдан ўзиб кетди.