Россия компанияси Ўзбекистонга газ қазиб олиш объектлари учун мобиль электростанциялар етказиб беради
Тошкент. 26 июл. ЎзТАГ – Россиянинг “БПЦ Инжиниринг” компанияси “Ўзбекнефтегаз” МХК қатор газ қазиб олиш объектлари учун ENEX электростанцияларини тайёрлаш ва етказиб бериш бўйича шартнома имзолади, деб хабар беради Ўзбек телеграф агентлиги (ЎзТАГ).
“Яқин орада Ўзбекистондаги “Шўртан” газ-кимё мажмуасида Россияда ишлаб чиқарилган иккита қуввати 1000 кВтлик микротурбинали ENEX 1000 электростанциялари ўрнатилади. “Шўртаннефтегаз” корхонасининг яна учта конида чиқувчи йўлдош газларни ENEX 65 ва учта ENEX 130 станциялари ёқиб, электр манбаига айлантиради. Олинган энергия газ объектларининг эҳтиёжларига сарфланади. Электростанцияларнинг ялпи қуввати 2455 кВтни ташкил этади”, - деб таъкиидлашди россия компаниясида.
ENEX электростанцияларидан фойдаланиш “Ўзбекнефтегаз” МХКга йилига 7 млн куб метрдан кўпроқ йўлдош газни ёқиш баробарида ундан самарали фойдаланиш имконини беради.
Бундан ташқари, авваллари шунчаки машъала қувурларида ёқилган ва ҳеч қандай фойда келтирмаган йўлдош газлардан электр қуввати ишлаб чиқариш компанияга ишлаб чиқаришда энергия сарфини камайтириш ва бир пайтнинг ўзида атмосферага чиқарилаётган зарарли газлар миқдорини қисқаришига ҳам имкон беради.
Эслатиб ўтамизки, лойиҳа Жаҳон банки ҳомийлигида йўлдош газларни ёқишни қисқартириш Глобал ҳамкорлик дастури (GGFR) доирасида амалга оширилмоқда. “Ўзбекнефтегаз” МХК 2008 йилдан буён GGFRнинг ҳамкори ҳисобланади ва машъала ускуналарида нефтнинг йўлдош газини ёқишни қисқартириш бўйича фаол комплекс чоралар кўриб келади.
