Россия телеканалида Ўзбекистон ҳақида янги фильм намойиш этилди

Тошкент. 20 октябр. ЎзТАГ – 18 октябрда “Россия 1” телеканалида “Ўзбекистон. Саҳро жавоҳири” номли хужжатли фильмнинг премьераси бўлиб ўтди. Картинани суратга олиш ишлари Тошкент, Самарқанд, Бухоро, Хива шаҳарларида бўлиб ўтган, дея хабар беради Ўзбек телеграф агентлиги (ЎзТАГ).

Infocom.uz журнали таҳририятида хабар қилишларича, хужжатли фильм “Мастерская” кинокомпанияси жамоаси томонидан продюсер Саида Медведева бошчилигида суратга олинган. Россиялик суратга олиш гуруҳига Ўзбекистондаги ҳудудий кинокомпаниялардаги ҳамкасабалари ҳамроҳлик қилганлар.

Фильм Ўзбекистоннинг қадим тарихи, осори атиқалари ва бу ерда яшаб ўтган тарихий шахслар ҳақида ҳикоя қилади. Лентадан “шойи” миллий матосини тўқиш, самарқанд қоғозини тайёрлаш, ўзбек нонларини пишириш анъаналари тасвири ҳам ўрин олган.

Шунингдек, фильм Russia.tv сайтига ҳам намойиш этилди ва уни бу ердаги “сайт архиви” бўлимида ҳозирда ҳам кўриш мумкин.