Россия ва араб клублари ўзбек яримҳимоячиси Азиз Ҳайдаровга қизиқмоқда
Тошкент. 10 январ. ЎзТАГ – Россия ва араб клублари Ўзбекистон термасининг яримҳимоячиси Азиз Ҳайдаровга қизиқиш билдирмоқда, деб хабар беради Ўзбек телеграф агентлиги (ЎзТАГ).
Спорт ресурслари маълумотларига кўра, Бирлашган Араб Амирликларининг “Ал Шабаб” клуби Ҳайдаровга ҳозиргача янги шартнома таклиф этган йўқ. Айни пайтда 31 ёшли ўзбек футболчисининг шартномаси ярим йилдан кейин ниҳоясига етади.
Россия ва араб клубларидан ташқари ўйинчи билан бир неча маҳаллий жамоалар ҳам қизиқишмоқда.
Эслатиб ўтамизки, 2011 йилда тошкентнинг “Бунёдкор” клуби Азиз Ҳайдаровни араб жамоасига 300 минг фунт стерлинг эвазига сотган эди.
Кейинчалик, Австралияда бўлиб ўтган 2015 йилги Осиё кубогида хитой клубларидан бири Ҳайдаровни $5 млнга сотиб олиш таклифи билан чиқди, бироқ футболчининг агенти Санъат Шариповнинг маълумотига кўра, “Ал-Шабаб” раҳбарияти бундай футболчи ўзларига ҳам кераклигини таъкидлаб, таклифдан вос кечди.
