Россияда “Альтернатива” ҳаракати фаоллари 35 ёшли ўзбекистонликни қулликдан қутқариб олдилар
Тошкент. 6 феврал. ЎзТАГ – Россиянинг Уфа шаҳрида “Альтернатива” ҳаракати фаоллари 35 ёшли ўзбекистонликни қулликдан қутқариб олдилар, деб хабар беради Ўзбек телеграф агентлиги (ЎзТАГ) “Такие дела” порталига таянган ҳолда.
Уни беш йил давомида қурилишда текинга ишлашга мажбур қилишган.
“Ўзбекистон фуқароси Уфа шаҳрига пул ишлаш учун келган. Ўзларини қурилиш компаниясининг раҳбарлари сифатида таништирган одамлар қурилиш майдончасида ишлашни таклиф қилишган ва у бунга рози бўлган”, - деди “Такие дела” порталига “Алтернатива” раҳбари Олег Мельников.
Шундан кейин айтилишича, Россия фуқароси бўлган бир неча киши унинг ҳужжатларни олиб, квартирага қулфлаб қўяди. “Эркак ҳар куни қурилиш майдончасида ишлаш учун олиб кетилган ва унинг иши учун ҳеч нарса тўланмаган. Шунингдек, у милицияга хабар беришга уринадиган бўлса – таҳдид қилишган”, - дейилади хабарда.
“Одам уч йил қулликда бўлганлигини бизга инсон ҳуқуқлари ҳимоячилари айтишди. Бу одамнинг рус тилида жуда ёмон гапирганлиги ва фақат ўзини ушлаб туришган генерал Кусимов кўчаси ва уйнинг рақамини айта олганлиги қутқарув амалиётини қийинлаштирди. Бу кўчада 14 кўп қаватли уйлар жойлашган! Аммо кишининг манзилини топишга муваффақ бўлдик. Операция 1 февралдан 2 февралга ўтар кечаси, милиция ходимларининг иштирокисиз ўтказилди. Биз ҳуқуқни муҳофаза қилиш органларидан бир неча марта ёрдам сўрадик, аммо ҳеч кимни топа олмадилар. Шунинг учун 90 фоиз ҳолларда биз ҳамма ишни ўзимиз қиламиз”, - деб ҳикоя қилади Мельников.
Эркак қулликда бўлган пайтида унинг Россияда ишлаш учун рухсатнома муддати тугаган. У жаримани тўлагач, Ўзбекистонга қайтиб кетади.
Эслатиб ўтамизки, “Такие дела” – Россиянинг “Нужна помощь” хайрия жамғармасининг ахборот порталидир.
Сурат манбаи: http://www.infotop.lv/article/ru/latvija-vse-eshe-otstaet-ot-estonii-i-litvi-v-reitinge-ekonomicheskoi-svobodi
