Россиялик маркетолог Игорь Манн Тошкентда семинар ўтказади
Ташкент. 25 июн. ЎзТАГ – 28 июн куни Тошкентда россиялик таниқли маркетолог Игорь Манн семинар ўтказиб, фойдани кўпайтириш сирлари ва бизнесни юритиш бўйича энг яхши стратегиялар билан ўртоқлашади, деб хабар беради Ўзбек телеграф агентлиги (ЎзТАГ).
“Maslov PR Tashkent” компаниясидан хабар қилишларича, тадбирнинг “Тезланиш қўшиб” номли биринчи қисмида компания фойдасини кўпайтириш йўллари, одамлар ва мижозлар билан ишлаш сирлари ҳақида сўз боради.
Семинарнинг иккинчи қисмида қандай қилиб мижозлар эҳтиёжларини биринчи ўринга қўйиш, буни амалга оширишнинг энг самарали услублари ҳақида гап кетади. Бунда мижозларни жалб қилишнинг амалий жиҳатларига ҳам эътибор берилади.
Семинар маркетинг бўлимлари бошлиқлари ва савдо вакиллари, бош директорлари ва бошқарувчи ҳамкорларга мўлжалланган.
Ташкилотчилар фикрига кўра, Игорь Манн бугунда Россиядаги маркетинг бўйича энг нуфузли тренерлардан бири бўлиб, маркетинг билан 1993 йилдан бери шуғулланади. У Россия Маркетологлар гилдиясининг “Йил маслаҳатчиси” унвонига ҳам сазовор бўлган.
Эслатиб ўтамизки, у “100% маркетинг”, “Бюджетсиз”, “Маркетинг Машина” каби китоблар муаллифи ҳамдир. У американингLucent ва Avaya компанияларида маркетинг бўйича директор бўлиб ишлаган.
