Руминиянинг Тошкентдаги элчихонасига таъзия билдирилди

Тошкент. 4 ноябр. ЎзТАГ – Куни-кеча Руминиянинг Тошкент шаҳридаги элчихонасида 30-октябр куни Бухарест шаҳридаги содир бўлган ёнғинда ҳалок бўлганлар хотирасига мамлакатда 3 кунлик умумхалқ мотами эълон қилинганлиги муносабати билан очилган Ҳамдардлик китобига Ўзбекистон Республикаси Ташқи ишлар вазирлиги номидан қайд киритилди, деб хабар беради Ўзбек телеграф агентлиги (ЎзТАГ).

Эслатиб ўтамизки, шанба куни Бухарест марказидаги машҳур тунги клублардан бирида ёнғин содир бўлган эди. Натижада 30 киши қурбон бўлиб, яна 180 атрофида киши жабрланди. Уларнинг кўпчилиги оғир аҳволда.

Ёнғин бепул рок-концерт доирасида содир бўлиб, тадбирга 400 ёшлар ташриф буюрган бўлган. Бошланғич маълумотларга кўра, пиротехник шоу доирасида томдаги пенопласт безакларга ўт кетган, туташ бошланиб, кейин портлаш содир бўлган.

Натижада кўплаб ташриф буюрганлар ягона чиқиш йўлига отилганлар ва бу ерда тиқилинч юзага келган. Кўпчилик бўғилиш туфайли ҳаётдан кўз юмган.

Воқеа жойига 60 тез ёрдам ва ёнғин бригадалари етиб келганлар. Жабрланганлар Бухарестнинг 10 касалхонасига олиб борилган.

Руминия президенти Клаус Йоханнис вафот этганларнинг оилаларига таъзия билдирди. “Мен фожеадан қаттиқ қайғудаман. Бу барчамиз учун ўта оғир йўқотиш”, - деб ёзди у ўзининг Facebookдаги саҳифасида. Фожеа сабаблари ўрганилмоқда.