Руслан Чагаев Фрес Окендога қарши рингга чиқишдан бош торгани учун чемпионлик мақомидан маҳрум қилинди
Тошкент. 27 июл. ЎзТАГ – Ўзбекистонлик боксчи Руслан Чагаев Бутунжаҳон бокс ассоциацияси (WBA) версияси бўйича пуэрториколик Фрес Окендога қарши рингга чиқишдан бош торгани учун чемпионлик мақомидан маҳрум қилинди, деб хабар беради Ўзбек телеграф агентлиги (ЎзТАГ).
Ушбу қарор WBA раҳбарияти томонидан қабул қилинган.
ТАСС спортчи промоутери Тимур Дугазаевга асосланиб хабар қилишича, Чагаевда соғлиқ билан боғлиқ муаммолар бор. “Русланда соғлиқ билан боғлиқ муаммолар мавжуд. WBA у узоқ вақт жангга киришмаётгани сабабли чемпионлик мақомидан маҳрум қилингани ҳақида бизга хабар юборди”, - деб таъкидлади у.
Олдинроқ WBA Русланга чемпионлик камарини қайтариб, австралиялик Лукас Браунни допинг учун 6 ойга дисквалификация қилган эди.
Эслатиб ўтамизки, Руслан Чагаев ва Лукас Браун ўртасидаги чемпионлик жанги 5 март куни Грозний шаҳрида бўлиб ўтган эди. Ўшанда ўзбекистонлик боксчи рақибига 10-раундда техник нокаут билан мағлуб бўлган эди. Браун жангдан кейин топширган допинг-текширувида унинг қонидан таъқиқланган кленбутерол моддаси аниқланган эди.
