Самарқандда божхона учувчисиз қурилмани ноқонуний олиб киришга уринишга чек қўйди
Самарқанд. 14 апрел. ЎзТАГ – Самарқанд аэропортида учувчисиз қурилмани ноқонуний олиб киришга уринишга чек қўйилди, деб хабар беради Ўзбек телеграф агентлиги (ЎзТАГ).
Давлат божхона қўмитаси маълумотларига кўра, Самарқанд вилояти божхона бошқармаси “Самарқанд аэропорт” чегара божхона пости ходимлари “Санкт-Петербург-Самарқанд” йўналишидаги авиарейс билан учиб келган йўловчиларнинг қўл юкларини божхона кўригидан ўтказиш давомида йўловчи божхона декларацияси ва божхона ходимларининг оғзаки сўрови пайтида маълум қилинмаган “SYMA” учувчисиз учиш аппаратини яширин равишда олиб киришга урингани аниқланди. Қурилмани олиб келган фуқарога нисбатан маъмурий иш очилди.
Олиб қўйилган учувчисиз қурилма видеокамера, барометр билан жиҳозланган бўлиб, смартфонга масофадан тасвир узатиш функциясига эга бўлган.
Самарқанд шаҳар жиноят ишлари бўйича судининг жорий йил 17 мартдаги қарорига асосан қонунбузар энг кам иш ҳақининг уч баравари миқдорида жаримага тортилди. Ҳуқуқбузарлик ашёси сифатида олиб қўйилган учувчисиз учиш аппарати ўрнатилган тартибда йўқ қилинади.
Эслатиб ўтамизки, Вазирлар Маҳкамасининг “Ўзбекистон Республикаси ҳаво ҳудудида учувчисиз учиш қурилмаларидан рухсатсиз фойдаланишнинг олдини олиш чоралари тўғрисида” 2014 йил 26 ноябрдаги 322-қарорига мувофиқ, Ўзбекистон худудига 2015 йилнинг 1 январидан учувчисиз учиш қурилмаларни олиб кириш таъқиқланган.
Ушбу ҳужжат ҳаво кемалари хавфсизлигини таъминлаш ва Ўзбекистон Республикаси ҳаво ҳудудидан рухсатсиз фойдаланишнинг олдини олиш мақсадида қабул қилинган.
