Самарқандда инвестицион муҳит муҳокама қилинди

Тошкент. 6 май. ЎзТАГ – Самарқандда кичик бизнес ва хусусий тадбиркорликни ривожлантириш учун инвестиция иқлими ва ишбилармонлик муҳитини яхшилаш масалалари муҳокама қилинди, дея хабар беради “Вкурсе.uz” портали.
Тадбирда вилоят адлия, солиқ, банк, статистика, иқтисодиёт бошқармалари ҳамда тадбиркорлар иштирок этди. Ҳозирги пайтда вилоятда 14 мингдан зиёд кичик бизнес ва хусусий тадбиркорлик субъектлари фаолият юритмоқда. 2014 йилнинг биринчи чорагида уларнинг ҳудудий ялпи маҳсулотдаги улуши 67,3% ташкил қилди.
Солиқ ва бошқа ҳисоботларни ўз вақтида топшираётган ва ишлаб чиқариш рентабеллиги ва барқарор ўсиш суръатларини таъминлаётган тадбиркорлик субъектлари фаолиятини текширишга қўйилган мораторий 2017 йилнинг 1 январига қадар чўзилди.
2014 йилнинг 1 июлидан бошлаб енгил ва озиқ-овқат саноати, қурилиш материаллари ишлаб чиқариш соҳасида фаолият юритаётган кичик корхоналар учун ишчи ходимларнинг энг кўп сонига қўйилган чеклов 200 кишигача кўпайтирилди. Улардан банк хизматлари учун олинадиган фоиз ҳам бекор қилинди.
Шунингдек, тадбирда вилоятда фаолият юритаётган кичик корхоналар ривожи учун тўсиқ бўлаётган сабаблар изланди, зарар кўриб ишлаётган корхоналарни молиявий соғломлаштириш масалалари таҳлил этилди.
Тегишли муассасалар вакиллари тадбиркорларни қизиқтирган саволларга жавоб бердилар, деб ёзади портал.