Самарқандлик қутқарувчилар тоғларда адашиб қолган болаларга ёрдам беришди
Самарқанд. 30 июн. ЎзТАГ – Самарқандлик қутқарувчилар тоғларда адашиб қолган болаларга ёрдам беришди, деб хабар беради Ўзбек телеграф агентлиги (ЎзТАГ).
“2017 йилнинг 26 июн куни тонгги соат 07:40да Самарқанд вилояти Фавқулодда вазиятлар бошқармаси навбатчилик қисмига келиб тушган маълумотга кўра, Ш.Тошпўлатова 25 июн куни ўртоқлари билан Қўшработ туманидаги тоғли ҳудудга дам олиш учун боришган. Саёҳат чоғида улар йўлдан адашиб қолганлиги сабабли кечқурун тоғда тунашга мажбур бўлишган”, - дейилади хабарда.
ФВВ маълумотига кўра, олинган хабар асосида, қутқарув отряди навбатчи сменаси зудлик билан воқеа жойига чиқиб кетган ҳамда адашганларга психологик ёрдам кўрсатган.
Қидирув-қутқарув ишлари Қўшробод тумани ИИБ ходимлари билан ҳамкорликда ташкил этилган. Жабрланганлар шу куннинг ўзида тахминан соат 15:30да тоғ чўққисида топилган ва уларни аҳоли яшаш жойига эвакуация қилиш тадбирлари амалга оширилган. Уларга биринчи тиббий ёрдам кўрсатилган ва соғ-саломат ота-оналарига топширилган.
