Сайловларда биз жойларнинг кўпини эгалладик, лекин ушбу кўрсаткич янада юқори бўлиши мумкин эди – Содиқжон Турдиев

Тошкент. 23 декабр. ЎзТАГ – Ўзбекистон Либерал-демократик партияси (ЎзЛиДеП) Сиёсий кенгаши Ижроя қўмитаси раиси Содиқжон Турдиев партиянинг парламент қуйи палатасига сайловлардаги иштирокига бағишланган брифинг ўтказди, дея хабар беради Ўзбек телеграф агентлиги (ЎзТАГ).

“Ушбу сайловларда жойларнинг кўпини эгаллаган бўлсакда, ушбу кўрсаткич янада юқори бўлиши мумкинлигини таъкидламоқчи эдим. Ушбу кўрсаткич сайловларда иқтисодиётимизнинг ўсишига ҳисса қўшаётган, Давлат бюджетининг асосий қисмини тўлдираётган кичик бизнес ва хусусий тадбиркорлар, фермер ва ташаббускор кишилар номидан қатнашаётган партия учун етарли эмас”, – деди Содиқжон Турдиев.

ЎзЛиДеП етакчисининг сўзларига кўра, партия мавжуд имкониятлардан янада тўлиқроқ фойдаланиши, халқ орасида янада чуқурроқ кириб бориши, тарғиботни янада кучайтириши лозим.

“Юқоридагилардан келиб чиққан ҳолда, ЎзЛиДеП сайлов штабининг бугунги йиғилишида партия сайловларнинг иккинчи турига жиддий тайёрланиши зарар, деган хулосага келдик. Чунки 2009 йилги сайловларнинг иккинчи турида 27 жойдан 18 тасини эгаллаган эдик. Бу эса, ЎзЛиДеПнинг катта имкониятларидан дарак беради. Шундан келиб чиққан ҳолда партиямиз 2015 йил 4 январдаги қайта сайловда бутун кучини ишга солиб, қолган ўринлар учун жиддий курашади”, – деб таъкидлади С.Турдиев.