Шахрисабзда европа киноси фестивали бўлиб ўтади

Тошкент. 26 сентябр. ЎзТАГ – 28-30 сентябр кунлари Шахрисабздаги Маданият саройида илк марта европа киноси фестивали бўлиб ўтади, деб хабар беради Ўзбек телеграф агентлиги (ЎзТАГ).

Тадбир Европа Иттифоқининг (ЭИ) Ўзбекистондаги делегацияси томонидан “Ўзбеккино” миллий агентлиги билан биргаликда Қашқадарё вилояти ҳокимлиги кўмагида ташкил этилди.

Фестиваль доирасида Бельгия, Латвия, Словения, Швейцария, Финляндия, Чехия ва Венгрияга мансуб 7 фильм намойиш этилади.

Фестивалнинг очилиши Европа Иттифоқининг Ўзбекистондаги элчиси Э. Стипрайс ва Чехия Республикаси миссиясининг раҳбари ўринбосари М. Посписилова иштирокида бўлиб ўтади.

Фестиваль Р. Хавликнинг (Чехия) “Эмма учун эртаклар“ фильми билан очилади.

Фестиваль дастуридан “Компьютердан кўпроқ хавфли бува” (Латвия), “Бубуль” (Швейцария, Бельгия), “Она ва бошқа ақлдан озган қариндошлар” (Венгрия), “Тўрт унсур” (Финляндия), “У баскетболчи бўлсин” (Словения), “Севгида ақлдан озган” (Швецария) фильмлари ҳам ўрин олган.

Барча фильмлар асл тилида рус ва ўзбек тилларидаги титрлар билан биргаликда кўрсатилади. Намойишларга кириш бепул.

Эслатиб ўтамиз, Ўзбекистонда ҳар йили ўтказиладиган ва географиясини аста секин кенгайтираётган фестиваль олтинчи марта ўтказилади.

 

Сурат манбаи: из https://nuz.uz