Шавкат Мирзиёев “Ангрен” махсус саноат ҳудудининг ривожланиш суръатларидан қаноат ҳосил қилди
Тошкент. 22 сентябр. ЎзТАГ – Ўзбекистон Республикаси Президенти вазифасини бажарувчи, бош вазир Шавкат Мирзиёев “Ангрен” махсус саноат ҳудудининг ривожланиш суръатларидан қаноат ҳосил қилди, деб хабар беради Ўзбек телеграф агентлиги (ЎзТАГ).
“Мамлакатимизнинг Биринчи Президенти Ислом Каримов ташаббуси билан чет эл инвестицияларини кенг жалб қилиш мақсадида 2012 йилда ташкил этилган “Ангрен” махсус саноат зонасида кенг кўламли ишлар, жумладан, 11 йирик инвестиция лойиҳаси амалга оширилди. Жорий йилнинг охирига қадар яна 7 ишлаб чиқариш қувватини фойдаланишга топшириш режалаштирилган”, - дейилади Ш. Мирзиёевнинг Ангрен шаҳрига ташрифи якунлари бўйича Ўзбекистон Республикаси Президенти матбуот хизмати сайтида жойлаштирилган ҳисоботда.
Таъкидланишича, у Ўзбекистоннинг Биринчи Президенти Ислом Каримовнинг қарорига мувофиқ ҳаётга татбиқ этилаётган “Ангрен» махсус саноат зонаси ҳудудида конвейер ленталари, қишлоқ хўжалиги техникаси ва автомобиль шиналари ишлаб чиқаришни ташкил этиш” лойиҳасининг амалга оширилиш жараёни билан танишди. “Бу ерда йилига 100 минг погон метр конвейер лентаси, қишлоқ хўжалиги техникаси учун 200 мингта шина, 3 миллион дона автомобиль шинаси ишлаб чиқаришни йўлга қўйиш кўзда тутилган. Мазкур йирик саноат корхонаси мустақиллигимизнинг 26 йиллиги арафасида ишга туширилиши қайд этилди”, - дейилади ҳисоботда.
Хабарда қайд этилишича, лойиҳанинг амалга оширилиши 1 минг 200 иш ўрни ташкил этиш имконини беради.
Эслатиб ўтамизки, 20 сентябрда Ш.Мирзиеёв жойларда ижтимоий-иқтисодий ислоҳотларнинг бориши билан яқиндан танишиш мақсадида Ангрен шаҳрига ташриф буюрган эди.
