Шавкат Мирзиёев Ангрен шаҳрига ташриф буюрди
Тошкент. 21 сентябр. ЎзТАГ – Кеча, 20 сентябрда Ўзбекистон президенти вазифасини бажарувчи Шавкат Мирзиёев жойлардаги ижтимоий-иқтисодий ислоҳотларнинг бориши билан яқиндан танишиш мақсадида Ангрен шаҳрига ташриф буюрди, деб хабар беради Ўзбек телеграф агентлиги (ЎзТАГ).
Хабар берилишича, Шавкат Мирзиёев “Ангрен” МСҲ конвейер ленталари, қишлоқ хўжалиги техникаси ва автомобиль шиналари ишлаб чиқаришни ташкил этиш” лойиҳасининг амалга оширилиши билан танишди. Бу ерда йилига 100 минг погон метр конвейер лентаси, қишлоқ хўжалиги техникаси учун 200 мингта шина, 3 млн дона автомобиль шинаси ишлаб чиқаришни йўлга қўйиш кўзда тутилган. Мазкур йирик саноат корхонаси мустақиллигимизнинг 26 йиллиги арафасида ишга туширилиши режалаштирилган.
“Шу куннинг ўзида Шавкат Мирзиёев Ангрен ИЭСда 2016 йилнинг август ойида ишга туширилган янги энергия блокини кўздан кечирди. Замонавий технологиянинг жорий этилиши натижасида йилига 1 млн тонна кўмирдан самарали фойдаланишга эришилади ва бу орқали 840 млн кВт/соат электр энергияси ва 423 минг гигакалория иссиқлик энергияси ишлаб чиқарилади”, - деб таъкидланади ҳукумат хабарида.
Давлат раҳбари вазифасини бажарувчи “Ўзбеккўмир” АЖ фаолияти, Ангрен кўмир конида ёқилғи қазиб олиш ва етказиб бериш ишлари, бу ерда амалга оширилаётган техник қайта жиҳозлаш жараёни билан ҳам танишди. Йил бошидан буён конларни қазиш ишлари ҳажми 15,4 млн куб метрдан ошди, 2,6 млн тонна кўмир қазиб олинди. 2016 йилнинг охиригача кўмир қазиш ҳажмини 3,7 млн тоннага етказиш режалаштирилган.
Ангрен шаҳри раҳбарлари ва фаоллари иштирокида ўтказилган йиғилишда Тошкент вилоятини ижтимоий-иқтисодий ривожлантириш соҳасида йирик лойиҳаларни бошлаб берган Ўзбекистон Республикасининг Биринчи президенти Ислом Каримовнинг фаолияти, улкан хизматлари алоҳида таъкидланди.
Шу билан бирга йиғилишда Ангрен шаҳри ижтимоий инфратузилмасини модернизациялаш масалалари таҳлил этилди. Шаҳар ҳокими, тегишли вазирлик ва идоралар раҳбарларига мавжуд камчиликларни бартараф этишга доир кўрсатмалар берилди.
Шавкат Мирзиёев Тошкент вилоятига ташрифи давомида пахта ҳосилини йиғиб-териб олиш ва кузги экин ишларининг бориши билан ҳам танишди. Фермерлар, соҳа ходимлари билан учрашув чоғида қишлоқ хўжалиги ишларини қисқа муддатда уюшқоқлик билан ўтказиш масаласи атрофлича муҳокама этилиб, тегишли топшириқ ва тавсиялар берилди.
