Шавкат Мирзиёев барча гидроэлектростанцияларни бир тизимга бирлаштирди

Тошкент. 22 май. ЎзТАГ – Ўзбекистон президенти Шавкат Мирзиёев “Ўзбекгидроэнерго” акционерлик жамиятини ташкил этиш ҳақидаги фармонни имзолади, деб хабар беради Ўзбек телеграф агентлиги (ЎзТАГ).

Унинг таркибига илгари “Ўзбекэнерго” акциядорлик жамияти таркибига кирган, шунингдек, Ўзбекистон Республикаси Қишлоқ ва сув хўжалиги вазирлигининг “Ўзсувэнерго” бирлашмасига қарашли бўлган барча гидроэлектростанциялар ва соҳа билан боғлиқ барча бўлинмалар киради.

Янги компания гидроэлектростанцияларда электр энергияси ишлаб чиқариш соҳасида ягона техник сиёсатни амалга ошириш, гидротехник иншоотлардан хавфсиз ва самарали фойдаланишни таъминлаш, шунингдек, гидроэнергетика объектларини марказлаштирилган технологик бошқариш билан шуғулланади.

Шунингдек, у гидроэнергетика салоҳиятини комплекс ўзлаштириш асосида гидроэнергетика соҳасини ривожлантириш дастурларини ишлаб чиқиш ва амалга ошириш ҳамда республикамизнинг энергетика баланси таркибида гидроэнергетиканинг улушини кўпайтиришни таъминлаш учун масъул бўлади.

“Ўзбекгидроэнерго” АЖнинг гидроэлектростанцияларида ишлаб чиқарилган электр энергиясини сотишдан тушган маблағлар, фаолият юритаётган гидроэлектростанцияларни сақлаб туриш харажатларини чегириб ташлаган ҳолда, қайта инвестициялаш йўли билан Дастурда назарда тутилган янги гидроэлектростанциялар қуриш ва ишлаб турганларини модернизация қилишга йўналтирилади ҳамда юридик шахсларнинг фойда солиғи солиқ базасидан чиқарилади”, - деб таъкидланади хужжат матнида.

Гидроэлектростанцияларда ишлаб чиқарилган электр энергия учун ҳақ тўлаш қўшилган қиймат солиғини ҳисобга олган ҳолда истеъмолчилар учун пировард тарифнинг 85% миқдорида шакллантириладиган тарифлар бўйича амалга оширилади.