Шавкат Мирзиёев Ҳиндистон президентига поезд ҳалокатида инсонлар қурбон бўлгани муносабати билан таъзия билдирди
Тошкент. 22 ноябр. ЎзТАГ – Ўзбекистон Республикаси Президенти вазифасини бажарувчи Шавкат Мирзиёев Ҳиндистон Республикаси Президенти Пранаб Кумар Мукержига таъзия билдирди, деб хабар беради ТИВ матбуот хизмати.
“Шавкат Мирзиёев Ҳиндистон президентига Уттар-Прадеш штати Канпур шаҳрида юз берган темир йўл ҳалокати оқибатида кўплаб инсонларнинг нобуд бўлгани ва жароҳат олгани муносабати билан мактуб йўллади”, - дейилади хабарда.
Давлат раҳбари чуқур таъзия изҳор этиб, ҳалок бўлганларнинг оила аъзолари ва яқинларига ҳамда жабрланганларга самимий ҳамдардлик туйғуларини етказиб қўйишни сўраган.
ОАВ хабарларига кўра, 2 минг киши бўлган тезкор поезд Ҳиндистоннинг Уттар-Прадеш штати Пухраян станцияси атрофида Канпур шаҳрига 100 км яқинда масофада 20 ноябрда кечаси ҳалокатга учраган. Ҳалокат пайтда йўловчиларнинг кўпчилиги ухлаётган бўлган. Ҳалокатга ёзги ва қишки ҳароратнинг фарқи туфайли рельснинг бузилиши сабаб бўлганлиги айтилмоқда.
Сўнгги маълумотларга кўра оқибатда 142 йиши қурбон бўлган, яна 226 киши жароҳатланган, 76 киши жиддий жароҳат олган.
