Шавкат Мирзиёев Лондондаги терактлар муносабати билан таъзия билдирди
Тошкент. 5 июн. ЎзТАГ – Ўзбекистон президенти Шавкат Мирзиёев Буюк Британия ва Шимолий Ирландия Бирлашган Қироллиги Бош вазирига таъзия изҳор этилган мактуб йўллади, деб хабар беради Ўзбек телеграф агентлиги (ЎзТАГ).
“Лондон шаҳридаги террорчилик ҳужуми оқибатида инсонларнинг қурбон бўлгани муносабати билан чуқур таъзия изҳор этди. Биз ҳеч қанақасига оқлаб бўлмайдиган бундай ғайриинсоний ва шафқатсиз ҳаракатни қаттиқ қоралаймиз ҳамда халқаро ҳамжамият билан биргаликда мазкур жиддий таҳдидга қарши муросасиз курашни давом эттиришга тайёрмиз”, - деб таъкидланади давлат раҳбарининг ҳамдардлик мактубида.
Шунингдек, Ш.Мирзиёев ҳалок бўлганларнинг оила аъзолари ва яқинларига чуқур ҳамдардлик ва далда сўзларини етказиб қўйишни сўради ҳамда жароҳат олганларга тез фурсатларда соғайиб кетишларини тилади.
Эслатиб ўтамизки, 3 июнда автомобиль Лондон кўпригида пиёдалар йўлагига чиқиб кетиб, одамларни босиб кетди. Шундан сўнг, ундан пичоқ билан қуролланган кишилар чиқиб, йўловчиларга ҳужум қилди. Сўнгги маълумотларга кўра, хужумда 7 киши ҳалок бўлиб, 48 киши жароҳатланган, уларнинг баъзиларининг аҳволи ўта оғир ҳолатда.
