Шавкат Мирзиёев пойтахтнинг Учтепа туманидаги “Ватанпарвар иноқ коммуналчи” ХУМШ фаолияти билан танишди
Тошкент. 16 июн. ЎзТАГ – Ўзбекистон Президенти Шавкат Мирзиёев Учтепа туманига ташрифи чоғида “Ватанпарвар” маҳалласи ҳудудидаги “Ватанпарвар иноқ коммуналчи” хусусий уй-жой мулкдорлари ширкати (ХУМШ) фаолияти билан танишди. Бу ҳақида жума куни давлат раҳбарининг расмий веб-сайтида хабар қилинган.
Таъкидланишича, президент хусусий уй-жой мулкдорлари ширкати раҳбари Светлана Орлова билан ширкат фаолияти, кўп хонадонли турар жойларда аҳолининг уй-жой шароитини яхшилаш бўйича қилинаётган ишлар ҳақида суҳбатлашди. Ширкат ходимлари ва хонадон соҳибларининг қўл меҳнати билан обод масканга айланган бундай ширкатлар тажрибасини ўрганиш, уни бошқа туманларга ҳам кенг тарғиб этиш зарурлиги таъкидланди.
“Ишлайман, яратаман деган одамга кўп нарсанинг кераги йўқ. Оддий қўл меҳнати, кўпчиликнинг саъй-ҳаракати билан ўзи яшаётган ҳудудни шундай саранжом-саришта, файзли масканга айлантираётган юртдошларимиз кўпаяётгани бизни қувонтиради”, - деб таъкидлади Ш. Мирзиёев.
Олдин хабар қилингани каби, Ш. Мирзиёев жойларда амалга оширилаётган бунёдкорлик ва ободонлаштириш ишлари, ижтимоий-иқтисодий ислоҳотларнинг бориши билан яқиндан танишиш, халқ билан мулоқот қилиш мақсадида пойтахтнинг Учтепа туманига ташриф буюрди ва бу ерда қурилиши режалаштирилаётган истироҳат боғи лойиҳаси билан танишди.
Шунингдек, Учтепа туманидаги 78-мактабга ташриф буюрди ва бу ерда синов тариқасида 11-йиллик таълимни қайта тиклашни таклиф қилди.
Бундан ташқари, давлат раҳбари пойтахтнинг Учтепа туманидаги собиқ “Сигнал” заводи таркибида ташкил этиладиган технопарк лойиҳаси билан танишди.
