Шавкат Мирзиёев Режеп Тайип Эрдўғанга ҳамдардлик билдирди
Тошкент. 2 декабр. ЎзТАГ – Ўзбекистон Республикаси Президенти вазифасини бажарувчи Шавкат Мирзиёев Туркия Республикаси Президенти Ражаб Тойиб Эрдўғанга Адана шаҳридаги қизлар мактаб-интернатида юз берган фожиали ҳодиса муносабати билан самимий таъзия изҳор этилган мактуб йўллади, деб хабар беради Ўзбек телеграф агентлиги (ЎзТАГ).
Мактубда ҳалок бўлганларнинг ва жароҳат олганларнинг оила аъзолари ва яқинларига чуқур ҳамдардлик ва далда сўзлари изҳор қилинди”, - дейилади Ўзбекистон Республикаси ТИВ матбуот хизмати хабарида.
Эслатиб ўтамизки, 29 ноябр куни Туркия жанубидаги Адана вилоятининг Оладоғ шаҳрида мактаб ётоқхонасида келиб чиққан ёнғин оқибатида 10 ёшдан 14 ёшгача бўлган 12 нафар ўқувчи қиз ҳалок бўлган, 22 киши жароҳат олган эди.
Ёнғин чиққан уч қаватли бинода камтаъминланган оилаларга мансуб 28 қиз яшаган. Шунингдек, ўқутувчилардан бири ҳам ёнғинда ҳалок бўлган.
