Шавкат Мирзиёев Самарқанд вилоятига ташрифини Ислом Каримов қабрини зиёрат қилишдан бошлади
Тошкент. 14 апрел. ЎзТАГ – Ўзбекистон Президенти Шавкат Мирзиёев Самарқанд вилоятига ташрифини Биринчи Президент Ислом Каримов қабрини зиёрат қилишдан бошлади, деб хабар беради Ўзбек телеграф агентлиги (ЎзТАГ) давлат раҳбари матбуот хизматига асосланган ҳолда.
Ислом Каримов хотирасига Қуръон суралари тиловат қилинди.
“Давлатимиз раҳбарининг 2017 йил 25 январдаги “Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш тўғрисида”ги қарорига мувофиқ, бу борада изчил ишлар амалга оширилмоқда. Самарқанд шаҳрида Ислом Каримов дафн этилган ҳудудда ёдгорлик мажмуаси барпо этилмоқда”, - дейилади хабарда.
Лойиҳага мувофиқ, мақбара гранит ва мармар плиталар билан қопланиб, Қуръон оятлари битилган нақшлар билан безатилади. Зиёратчилар учун айвон, кексалар учун лифтлар бунёд этилади.
Давлатимиз раҳбари ушбу мақбара лойиҳаси билан танишди. Уни янада такомиллаштириш, зиёратчилар учун қулайликларни ошириш бўйича тавсиялар берди. Зиналарни пасайтириш, мажмуа атрофини кенгайтириш ва ободонлаштириш, замонавий тунги ёритиш тизими билан таъминлаш зарурлигини таъкидлади.
“Ислом Каримов мустақиллигимизга, халқимизнинг фаровон ҳаётига асос солган, маънавиятимизни тиклаган буюк инсон эди, деди Шавкат Мирзиёев. Мажмуада Биринчи Президентимизнинг буюклиги, пок иймон-эътиқоди, сермазмун ҳаёти акс этиши керак. Шу мажмуа тимсолида Ислом Каримовга бўлган меҳр-муҳаббатимизни, миллий ўзлигимизни кўрсатишимиз зарур”, - деди Мирзиёев.
Давлат раҳбари Ўзбекистон Биринчи Президенти мақбараси Ҳазрати Хизр масжиди билан уйғун бўлиши зарурлигини таъкидлади. Мақбарага монанд зиёратчилар учун баланд айвонлар бунёд этиш, расмий делегациялар учун ҳам кенг шароит яратиш бўйича кўрсатмалар берилди.
“Ушбу мажмуа юксак маънавият, илм-маърифат маскани бўлиши керак. Бинобарин бу юксак тарбиявий аҳамиятга эга. Мажмуада ҳамиша майин оҳангда Қуръон суралари янграб туриши, мақбара деворларига муқаддас оятлар билан бирга Ислом Каримовнинг ҳикматли сўзлари ҳам битилиши зарур. Токи зиёратга келганлар ўзига улкан руҳий қувват олсин, халқимизнинг илмига, маънавиятига ҳаваси ортсин”, - деб хулоса қилинади хабарда.
