Шавкат Мирзиёев Туркия ТИВ раҳбарини қабул қилди
Тошкент. 27 апрел. ЎзТАГ – 26 апрелда Ўзбекистон Президенти Туркия Ташқи ишлар вазири Мевлут Чавушўғлуни қабул қилди, деб хабар беради давлат раҳбарининг матбуот хизмати.
“Ўзбекистон – Туркия муносабатлари 2016 йилнинг 17-18 ноябр кунлари Самарқанд шаҳрида ўтган олий даражадаги музокараларда эришилган келишувларга мувофиқ изчил ривожланаётгани мамнуният билан қайд этилди”, - дейилади хабарда.
Шундан кейин қайд этилишича, ўзаро манфаатли савдо-иқтисодий ва инвестициявий ҳамкорликни ривожлантириш, Туркиянинг етакчи компаниялари иштирокида туризм инфратузилмасини модернизация қилиш, тўқимачилик, кўнчилик, кимё ва фармацевтика соҳалари, қурилиш материаллари саноати, қишлоқ хўжалиги маҳсулотларини чуқур қайта ишлаш ва бошқа йўналишларда, жумладан, “Ургут" эркин иқтисодий зонаси доирасида юқори технологияли замонавий ишлаб чиқариш қувватларини ташкил этиш бўйича лойиҳаларни амалга ошириш масалаларига алоҳида эътибор қаратилди.
Шунингдек, учрашувда минтақавий ва халқаро масалалар юзасидан ҳам фикр алмашилди.
Ўз навбатида, Мевлут Чавушўғлу Ўзбекистон Республикаси Президенти Шавкат Мирзиёевга қабул учун самимий миннатдорлик изҳор этди. Давлатимиз раҳбарига Туркия компанияларининг мамлакатимиздаги лойиҳаларини қўллаб-қувватлаётгани учун Туркия раҳбарияти номидан ташаккур билдирди ва кенг кўламли ўзаро ҳамкорликни янада ривожлантиришга тайёр эканини таъкидлади.
Эслатиб ўтамизки, Мевлут Чавушўғлу 25-26 апрел кунлари Ўзбекистонда расмий ташриф билан бўлди.
