Шавкат Мирзиёев Владимир Путинга Байкалорти ўлкасида ЙТҲ муносабати билан ҳамдардлик билдирди
Тошкент. 13 июн. ЎзТАГ – Ўзбекистон Президенти Шавкат Мирзиёев Россия Президенти Владимир Путинга Байкалорти ўлкасида қўпчиликнинг ҳаётдан кўз юмишига сабаб бўлган ЙТҲ муносабати билан ҳамдардлик билдирди. Бу ҳақида давлат раҳбарининг расмий веб-сайтида хабар қилинган.
“Байкалорти ўлкасида йўловчи автобуси иштирокида юз берган йўл-транспорт ҳодисаси оқибатида кўплаб инсонларнинг ҳалок бўлгани ва жароҳат олгани ҳақидаги хабарни чуқур қайғу билан қабул қилдим”, - дейилади сешанба кунги хабарда.
Шунингдек, Ш.Мирзиёев “қурбон бўлганларнинг оила аъзолари ва яқинларига самимий таъзия ва далда сўзларини етказиб қўйишни сўради ҳамда жароҳат олганларга тез фурсатларда соғайиб кетишларини” тилади.
Эслатиб ўтамизки, якшанба, 11 июнда Байкалорти ўлкасида ЙТҲ содир бўлди. “Байкал” автойўлининг 702-километрида ичида зиёратчилар бўлган KIA автобуси ағдарилиб кетди. Байкалорти ўлкаси Соғлиқни сақлаш вазирлигининг аниқлаштирилган маълумотларига кўра, автобус Красный Чикой қишлоғидан Читага 51 кишини олиб кетаётган бўлган. 14 киши ҳалок бўлган, 36 киши турли даражадаги жароҳатлар олган.
