Шавкат Мирзиёев ўзбек маҳсулотларининг ташқи бозорлардаги рақобатбардошлик даражаси пасайганлигидан норозилигини билдирди
Тошкент. 17 январ. ЎзТАГ – Ўзбекистон президенти Шавкат Мирзиёев ўзбек маҳсулотларининг ташқи бозорлардаги рақобатбардошлик даражаси пасайганлигидан норозилигини билдирди, деб хабар беради Ўзбек телеграф агентлиги (ЎзТАГ).
“Бу ўринда гап фақат экспорт ҳажмининг ўсиш кўрсаткичлари ҳақида бораётгани йўқ. Кун тартибида ўта жиддий масалалар турибди. Булар – мамлакатимизда яратилган технологияларнинг рақобатдошлигини таъминлаш, “ноу-хау” намуналарини яратиш, замонавий ахборот-коммуникация технологияларини жорий этиш, яъни юқори сифатли маҳсулот ишлаб чиқаришни таъминлаш бўйича тизимли чора-тадбирларни амалга оширишдир”, - деб таъкидлади Мирзиёев мамлакатни 2016 йилда ижтимоий-иқтисодий ривожлантиришнинг асосий якунлари ва 2017 йилга мўлжалланган иқтисодий дастурнинг энг муҳим устувор йўналишларига бағишланган Вазирлар Маҳкамасининг кенгайтирилган мажлисидаги маърузасида.
Унинг сўзларига кўра, “бизда улкан резервлар бор”. “Лекин шунга қарамасдан, ўтган йили жами $1 млрд 540 млнлик прогноз кўрсаткичлари бажарилмай қолди. Шундан $570 млн Вазирлар Маҳкамаси комплексларига қарашли корхоналарга тўғри келади. $970 млн миқдоридаги кўрсаткичлар эса ҳудудлардаги хўжалик юритувчи субъектлар томонидан бажарилмаган. Бизнинг маҳсулотимиз экспорт қилинадиган мамлакатлар сони 2010 йилга нисбатан 176тадан 138тага камайган”, - деб қайд этди Мирзиёев.
