Шу кунларда Ўзбекистонда қуёш коллекторлари ишлаб чиқарувчи янги қўшма корхона очилади
Тошкент. 2 сентябр. ЎзТАГ – Шу кунларда Ўзбекистондаги “Жиззах” эркин саноат ҳудудида қуёш коллекторлари ишлаб чиқариш бўйича янги қўшма корхона очилади, дея хабар беради Ўзбек телеграф агентлиги (ЎзТАГ).
“Ўзбекэнерго” давлат – акционерлик компанияси маълумотларига кўра, қўшма корхонанинг ишлаб чиқариш иншоот ва бинолари эксплуатацияга тайёр. Бугунга келиб уларни таъмирлаш ишлари якунланди, ишлаб чиқариш линияси ускуналарини монтаж қилиш ишлари тугалланмоқда.
Эслатиб ўтамизки, 2013 йил бошида “Ўзбекэнерго”нинг “Jizzax Hududiy Elektr Tarmoqlari Korxonasi” ОАЖ билан хитойнинг “Hangzhou Zhongwu Electronic Meters Company Limited” компанияси ўртасида “Жиззах” ЭСҲда қуёш коллекторлари ишлаб чиқаришга ихтисослашган “Quyosh Issiqlik Energiyasi” ҚКни ташкил қилишга доир шартнома имзоланган эди.
Лойиҳанинг умумий қиймати $3,34 млнга тенг бўлиб, корхона қуввати йилига 50 минг дона қуёш нури ёрдамида сув иситгиш қурилмаларини ишлаб чиқаришга етади. Бу ерда, шунингдек, 40 янги иш ўрни ҳам очилади.
