Си Цзиньпин Мирзиёевни Ўзбекистон мустақиллигининг 26 йиллиги билан табриклади

Тошкент. 30 август. ЎзТАГ – Хитой Халқ Республикаси Раиси Си Цзиньпин президент Шавкат Мирзиёев ва Ўзбекистон халқини республика мустақиллигининг 26 йиллиги билан табриклади, деб хабар беради Ўзбек телеграф агентлиги (ЎзТАГ).

“Сиз, Жаноби Олийлари ва бутун Ўзбекистон халқига Хитой халқи ва ўз номимдан қутлуғ сана – Ўзбекистон Республикаси мустақиллигининг 26 йиллиги муносабати билан самимий табрикларим ва энг эзгу тилакларимни изҳор этаман”, - дейилади ХХР раисининг Ўзбекистон ТИВ сайтида жойлаштирилган мактубида.

Си Цзиньпин Ш.Мирзиёев президент лавозимида фаолият бошлаганинидан буён, унинг раҳнамолигида стратегик аҳамиятга эга қатор улкан ўзгаришлар амалга оширилаётгани, янги имкониятлар очилаётгани, бу Ўзбекистон халқи томонидан кенг қўллаб-қувватланаётганини таъкидлаб ўтди.

“Фурсатдан фойдаланиб, Ўзбекистон Республикасига тараққиёт ва фаровонлик, халқингизга бахт-саодат тилайман”, - дея хулоса қилинади хабарда.

Эслатиб ўтамизки, Ўзбекистонда мустақиллик куни 1 сентябрда нишонланади.