SYTCO AG швейцар компанияси “Ўзметкомбинат”га технология ва ускуналар етказиб беради
Тошкент. 16 феврал. ЎзТАГ – SYTCO AG швейцар компанияси “Ўзметкомбинат”га технология ва ускуналар етказиб беради, деб хабар беради Ўзбек телеграф агентлиги (ЎзТАГ).
“Ўзметкомбинат” АЖ маълумотига кўра, “Sytco AG компанияси вакиллари “Машинасозлик саноати учун маҳкамловчи деталлар ишлаб чиқаришни ташкил этиш” инвестицион лойиҳасининг “16,0÷36,0 мм диаметрли иссиқ ҳолатда ҳайдалган прокатни ишлаб чиқариш учун ўраш асбоб-ускуналарни етказиб бериш” 2-сонли лот бўйича техник музокараларни ўтказиш ва шартномаларни тузиш масаласида ташриф буюришди.
Учрашув доирасида SYTCO AG компанияси ва “Ўзметкомбинат” АЖ мутахассислари ўртасида қўшма техник йиғилиш ўтказилди, унда лойиҳани амалга ошириш бўйича дастлабки концепция таҳлил қилинди ва “Машинасозлик саноати учун маҳкамловчи деталлар ишлаб чиқаришни ташкил этиш” инвестицион лойиҳасининг жорий ҳолати бўйича техник саволлар кўриб чиқилди.
Учрашув якуни бўйича технология ва технологик асбоб-ускуналарни шеф-монтаж, ишга тушириш-созлаш ва ходимларни ўқитиш билан етказиб бериш бўйича шартнома тузилди.
Инвестиция лойиҳасининг қиймати $12 млнни ташкил қилади. Лойиҳа мамлакатдаги энг йирик қора металлургия корхонасида 2017-2018 йилларда амалга оширилади.
“Ўзметкомбинат” АЖ ўз маблағлари ($4 млн) ва тижорат банкларининг кредитлари ($8 млн) лойиҳанинг молия манбаси бўлади.
Унинг амалга оширилиши ҳозирда ишламай турган метиз буюмлар цехи маҳсулотлари турларини кенгайтириб, бу ерда машинасозлик саноати учун 1,5 минг тонна атрофида маҳкамловчи деталлар – болтлар, гайкалар, шайба, шуруп ва бошқалар ишлаб чиқаришга имкон беради.
