Ташқи меҳнат миграцияси масалалари агентлиги онлайн рўйхатга олиш натижаларини бекор қилди

Тошкент. 20 апрел. ЎзТАГ –  Ўзбекистон Республикаси Ташқи меҳнат миграцияси масалалари агентлиги Жанубий Кореяда ишлашга боришни хоҳловчилар учун онлайн рўйхатга олиш ва тест синовлари натижаларини бекор қилди, деб хабар беради Ўзбек телеграф агентлиги (ЎзТАГ).

Агентликнинг Фейсбук-саҳифасида айтилишича, Жанубий Корея Республикасида ишлашга боришни хоҳловчилар учун онлайн рўйхатга олиш ва тест синовлари 2017 йилнинг 27-31 март ва 1-3 апрелида ўтказилган.

“Ташқи меҳнат миграцияси масаллари агентлиги онлайн рўйхатга олиш натижалари жиддий техник камчиликлар, шунингдек, тест синовлари жараёни кўплаб камчилик ва норозиликлар юзага келтиргани сабабли бекор қилинганлигини эътиборингизга етказади”, - дейилади хабарда.

Жанубий Кореяда ишлашга боришни хоҳловчилар учун онлайн рўйхатга олиш  жараёни қайтадан янада юқори техник имкониятлар ва киберҳужумлардан муҳофаза этилган ҳолда, янгича мукаммаллаштирилган тартибда ўтказилади.

Қайта рўйхатга олиш санаси ва тартиби ҳақида қўшимча маълумот берилиши таъкидланган.