“Tashkent Challenger – 2015” дунёнинг деярли 20 мамлакатидан теннисчиларни қабул қилади

Тошкент. 13 октябр. ЎзТАГ – Ўзбекистон пойтахтида Профессионал теннисчилар уюшмаси (ATP) сериясига кирувчи анъанавий “Tashkent Challenger – 2015” халқаро турнири бошланди, деб хабар беради Ўзбек телеграф агентлиги (ЎзТАГ).

Теннис федерациясидан хабар қилишларича, мусобақалар Республика олимпиа заҳиралари теннис мактаби кортларида бўлиб ўтмоқда. Яккалик ва жуфтлик мусобақаларида дунёнинг деярли 20 мамлакатидан теннисчилар иштирок этмоқда.

“Tashkent Challenger – 2015” турнирида мамлакат шарафини Денис Истомин, Фаррух Дўстов, Санжар Файзиев, Шониғматжон Шофайзиев, Жўрабек Каримов, Темур Исмоилов, Хумоюн Султонов, Саидаъло Саидкаримовлар ҳимоя қиладилар.

Жорий йилда Денис Истомин британиянинг Ноттингемидаги “Aegon Nottingham Open – 2015” ва швейцариянинг Гштаад шаҳридаги “Suisse Open Gstaad – 2015” халқаро турнирларининг бош совринларини қўлга киритди.

Туркиянинг Агри шаҳридаги “Agri Chellenger – 2015” мусобақасида ўзбек термасининг яна бир аъзоси Фаррух Дўстов яккаликда турнир ғолиби бўлди.