Ташкил этилганига кўп бўлмаган “КДБ Банк Ўзбекистон” соф фойдасини деярли икки бараварга кўпайтирди

Тошкент. 12 июн. ЎзТАГ – Бир йилдан бир оз ошиқ вақт давомида “КДБ Банк Ўзбекистон” банки 30,71 млрд сўм ($13,32 млн) миқдорда соф фойда олди, бу 2012 йилдаги кўрсаткич - 15,98 млрд сўмдан ($6,93 млн) деярли 2 бараварга кўп демакдир, дея хабар беради Ўзбек телеграф агентлиги (ЎзТАГ).
“КДБ Банк Ўзбекистон” ўз фаолиятини ЎзКДБ Банк ва RBS MB Uzbekistan банкларининг бирлашуви натижасида 2013 йилнинг мартида бошлаган эди. Банкнинг энг йирик (86,4%) акционери Корея Тараққиёт банки (KDB) ҳисобланади.
Банк ҳисоботига мувофиқ, 2013 йил якунлари бўйича молия муассасасининг умумий активлари миқдори 1,776 трлн сўмни ($770,89 млн) ташкил этган бўлиб, улар орасида пул маблағлари ва уларнинг муқобиллари улуши 73,1% тенг.
Банк низом капитали 25,13 млрд сўмдан ($10,9 млн) 40,44 млрд сўмгача ($17,55 млн) кўпайтирилган.
Молия муассасасининг низом капитали рентабеллиги 92,25%, мутлақ ликвидлик кўрсаткичи 111,7% ташкил қилди. Эмитентнинг ўз ва жалб қилган маблағлари мутаносиблиги 10,16% тенг.