Термиз университети янги кутубхона тизимини олди

Тошкент. 23 июл. ЎзТАГ – Термиз Давлат университетининг (Сурхандарё вилояти) ахборот-ресурс маркази эндиликда KaDaTa (KaDaTa Server 3.0 ААКТ) ахборот кутубхона тизимининг учинчи версияси асосида ишламоқда, дея хабар беради Ўзбек телеграф агентлиги (ЎзТАГ).
BePro Дастурчилар марказидан хабар қилишларича, лойиҳа Марказ томонидан Ўзбекистон Миллий кутубхонаси билан ҳамкорликда амалга оширилган.
BePro мутахассислари томонидан Термиз Давлат университетининг ахборот-ресурс маркази ходимлари учун уч кунлик ўқув курси ҳам ташкил этилди.
KaDaTa Server 3.0 ААКТ йирик кутубхоналарга мўлжалланган. У сервер ускуналарининг мўътадил ишлашини таъминлайди. Тизим кутубхона ресурсларидан локал ва интернет орқали фойдаланишга имкон беради.
“Деярли бутун кутубхона локал электрон каталогга эга. Лекин бугунда бунинг ўзи камлик қилади. Кутубхона ресурсларидан масофадан туриб фойдаланишга имкон яратиш ва бошқа кутубхоналарнинг электрон ресурслари билан бирлашиш лозим”, - деб ҳисоблайди “BePro” Маркази лойиҳа менежери Ойдин Рустамова.
Эслатиб ўтамизки, KaDaTa тизими фойдаланувчиларга хизмат кўрсатиш ва ресурслардан фойдаланишни автоматлаштиради.