"Тезкор почта” почта жўнатмаларини Ўзбекистоннинг исталган жойига 24 соатда етказиб беришга ваъда бермоқда

Тошкент. 10 апрел. ЎзТАГ – “Тезкор почта” почта жўнатмаларини Ўзбекистоннинг исталган жойига 24 соатда етказиб беришга ваъда бермоқда, деб хабар беради Ўзбек телеграф агентлиги (ЎзТАГ).

Юқоридаги номдаги янги хизмат тури бўйича синов лойиҳаси “Ўзбекистон почтаси” АЖ миллий почта алоқаси оператори томонидан йўлга қўйилди.

“Жорий йилнинг 10 апрелидан “Тезкор почта” хизмати доирасида почта жўнатмаларини қабул қилиш ва етказиб беришни 15 та почта алоқаси объектлари амалга оширади. Кейинчалик “Ўзбекистон почтаси” АЖ ушбу хизматни кўрсатувчи почта объектлари рўйхатини кенгайтиради. Жўнатмаларнинг қабул қилиниши ва етказиб берилиши қисқа муддатларда ва ҳамёнбоб нархларда амалга оширилади”, - дейилади компания хабарида.

Таъкидланишича, Тошкентдан Нукусгача ва бошқа вилоятлар марказларигача жўнатмалар 24 соат ичида етказиб берилади ва олувчилар зудлик билан почта жўнатмаси ҳақида телефон орқали хабардор қилинадилар.

“Тезкор почта” жўнатмаларида “Почта алоқаси хизматларини кўрсатиш қоидалари”га мувофиқ ички почта жўнатмалари учун белгиланган ҳужжатларни, иш қоғозларини ва халқ истеъмоли молларини жўнатишга йўл қўйилади.

Сурат манбаи: http://ictnews.uz/11/09/2017/ems-uzbekistan/