Ўтган йилда Ўзбекистон электротехника тармоғи 1,3 трлн сўмлик маҳсулот ишлаб чиқарди
Тошкент. 21 июн. ЎзТАГ – 2015 йилда “Ўзэлтехсаноат” акционерлик компанияси таркибига кирувчи корхоналар томонидан 1,3 трлн сўмлик маҳсулот ишлаб чиқарилди. Ушбу маълумотлар компания томонидан яқинда ўтказилган матбуот анжуманида очиқланди, деб хабар беради Ўзбек телеграф агентлиги (ЎзТАГ).
“Ўзэлтехсаноат” АК раиси ўринбосари Жаҳонгир Исмоиловнинг таъкидлашича, 2005 йилда 80 млрд сўмни ташкил қилган маҳсулот ишлаб чиқариш ҳажми сезиларли даражада ўсди.
Тармоқ корхоналари томонидан мамлакат турли тармоқларига 1 трлн сўмдан зиёдлик маҳсулотлар етказиб берилди. Улардан энергетика, нефтегаз, тоғ-кон саноатлари, ижтимоий тармоқ объектларида фойдаланилмоқда.
Ҳозирда “Ўзэлтехсаноат” АК тизимида 50 корхона фаолият юритиб, улар орасида кабель маҳсулотлари, электротехника, маиший техника маҳсулотлари ишлаб чиқарувчилар ва техник хизмат кўрсатиш корхоналари бор.
27 корхона маҳсулотлари Марказий Осиё, МДҲ ва бошқа мамлакатларга экспорт қилинмоқда. 2015 йилда экспорт ҳажми $167,7 млнни ташкил қилди (+72%).
