Ўтган йилда Ўзбекистонда электроэнергия ишлаб чиқариш 4% ўсди

Тошкент. 17 январ. ЎзТАГ – 2016 йилда Ўзбекистонда электроэнергия ишлаб чиқариш 2015 йилдагига нисбатан 4% ўсди ва 59 млрд кВт/сни ташкил қилди, деб хабар беради Ўзбек телеграф агентлиги (ЎзТАГ).

“2016 йилда “Ўзбекэнерго” электростанциялари томонидан 7,5 млн Гкал иссиқлик энергияси ишлаб чиқарилди. Маҳсулот экспорти вазифаси 100% бажарилди. Маҳсулотни маҳаллийлаштириш вазифаси прогнозга нисбатан 7,3% бажарилди. Маҳсулот таннархини 11,3% пасайтиришга эришилди”, - деб таъкидлашди “Ўзбекэнерго” матбуот хизматида.

Бундан ташқари, ўтган йилда 5 инвестиция лойиҳалари бўйича ишлар бажарилди.  Жумладан, компания Толимаржон ИЭСда қуввати 900 МВт бўлган ва Ангрен ИЭС қуввати 150 МВт бўлган буғ-газ қурилмаларини ишга туширди.

Шунингдек, “Ангрен” ЭИҲ Арматура-изолятор заводида арматура ва изоляторлар ишлаб чиқариш бўйича лойиҳанинг илк босқичи якунланди. Ҳозирда маҳсулот ишлаб чиқариш бошланди.