Ўтган йили Тошкентдаги Яккасарой технопарки 630 млрд сўмлик маҳсулот ишлаб чиқарди

Тошкент. 6 феврал. ЎзТАГ – Ўтган йили Тошкентдаги Яккасарой технопарки 630 млрд сўмлик маҳсулот ишлаб чиқарди ва қиймати $48,5 млнлик товарларни экспорт қилди, деб хабар беради Ўзбек телеграф агентлиги (ЎзТАГ).

“Ҳозир бу ерда 284 тадбиркорлик субъекти тўқимачилик, кимё саноати, озиқ-овқат, мебелсозлик, металлни қайта ишлаш, қоғоз, чарм-пойабзал, қурилиш материаллари ишлаб чиқариш, машинасозлик каби тармоқларда фаолият юритмоқда”, - деб таъкидлашди давлат раҳбарининг матбуот хизматида.

Тадбиркорларга қулайлик яратиш мақсадида технопарк ҳудудида банк шохобчаси, нотариал идора, темир йўл линияси хизмат кўрсатмоқда. Бу ерда 6,6 мингдан зиёд ишчи меҳнат қилмоқда.

Шавкат Мирзиёев технопарк ҳудудидаги лойиҳалар билан танишар экан, бундай кичик саноат зоналарини пойтахтимизнинг барча туманларида ташкил этиш, уларда кичик бизнес вакилларига кенг имтиёзлар яратиш зарурлигини таъкидлади. Мазкур корхоналарнинг хорижий ҳамкорлар топишига кўмаклашиш лозимлиги, бу уларнинг чет эл бозорларига чиқиши ва маҳсулотлари экспортини кенгайтиришда муҳим аҳамиятга эга эканини қайд этди.

Бугунги кунда собиқ тўқимачилик комбинати ҳудудида ташкил этилган технопаркнинг умумий ер майдони 61,2 гектар, бино ва иншоотлар майдони 338 минг квадрат метрга тенг.