ТИВда Савдо бўйича ўзбек-британ кенгаши ҳамраиси билан учрашув бўлиб ўтди
Тошкент. 5 ноябр. ЎзТАГ – Куни-кеча Ўзбекистон Республикаси Ташқи ишлар вазири Абдулазиз Камилов Буюк Британиянинг Ўзбекистондаги собиқ элчиси, Савдо ва саноат бўйича ўзбек-британ кенгаши ҳамраиси Барбара Логан Ҳейни қабул қилди, деб хабар беради Ўзбек телеграф агентлиги (ЎзТАГ).
ТИВ маълум қилишларича, вазир Барбара Логан Ҳейни Савдо ва саноат бўйича Ўзбекистон-Британия кенгаши ҳамраиси этиб тайинланганлиги билан табриклади ва ушбу кенгаш икки томонлама савдо-иқтисодий ва инвестицион ҳамкорликни фаоллаштириш ва кенгайтиришнинг самарали механизмларидан бири ҳисобланишини таъкидлади.
Бундан ташқари, Ўзбекистон ва Буюк Британия ишбилармон доиралари ўртасидаги ҳамкорликни мустаҳкамлаш истиқболлари ҳамда 5-ноябр куни Тошкент шаҳрида очилаётган Халқаро инвестиция форуми ишида нуфузли Британия делегацияси иштирокининг амалий масалалари муҳокама қилинди.
Шунингдек, томонлар халқаро кун тартибнинг баъзи масалалари юзасидан ҳам фикр алмашдилар.
Эслатиб ўтамизки, 2014 йил 6 ноябрда Тошкентда Савдо ва саноат бўйича ўзбек-британ кенгашининг 21-йиғилиши бўлиб ўтган эди. Унда британ бизнесининг турли тармоқларига оид 20 ортиқ компаниялар вакилларидан иборат делегация қатнашган эди.
Савдо ва саноат бўйича ўзбек-британ кенгаши 1994 йилда иккитомонлама келишув асосида ташкил этилган ва Буюк Британиянинг Савдо ва инвестициялар вазирлиги шефелигида фаолият юритади. Кенгашнинг бош мақсади Ўзбекистонда ишлаётган британ компаниялари, ўзбек иқтисодига сармоя киритишни режалаштираётган ширкатларни қўллаб-қувватлашдан иборат. Ўзбек томонидан Савдо ва саноат бўйича ўзбек-британ кенгаши ҳамраиси ТИАИСВ раҳбари Элёр Ғаниев ҳисобланади.
